ЗАХИРА БАРОИ ДАВРАИ ЗИМИСТОН. Дар Душанбе 15 ярмаркаи маҳсулоти мавриди ниёзи аввал ташкил гардид

Ноябрь 21, 2022 14:39

ДУШАНБЕ, 21.11.2022. /АМИТ «Ховар»/. Дар 15 нуқтаи сераҳолии шаҳри Душанбе ярмаркаҳои маҳсулоти мавриди ниёзи аввал бо нархҳои нисбатан арзон пешкаши сокинону меҳмонони пойтахт мегарданд. Ярмаркаҳои доимамалкунанда дар даромадгоҳҳои бозорҳои коммуналӣ ва хусусии пойтахт ҷараён доранд. Барои таъмини маҳсулот дар нуқтаҳои мазкур 38 адад сардхонаҳо бо ғунҷоиши 39 ҳазору 161,0 тонна маҳсулот мавҷуд мебошанд. Дар ин бора ба АМИТ «Ховар» сармутахассиси Раёсати рушди иқтисод ва савдои Мақомоти иҷроияи ҳокимияти давлатии шаҳри Душанбе Абдусалом Нозимов хабар дод.

Абдусалом Нозимов иброз намуд, ки ярмаркаҳои мазкур тибқи қарори дахлдори Раиси шаҳри Душанбе бо мақсади фаровонии дастархони мардум дар давраи тирамоҳу зимистон доир карда мешаванд. Дар онҳо барои сокинон маҳсулоти мавриди ниёзи аввал, аз ҷумла орд, пиёз, сабзӣ, картошка, равған, гӯшти гову мурғ ва дигар меваҷоту сабзавот бо нархҳои дастрас пешниҳод гардидаанд.

Дар пойтахт чӣ миқдор маҳсулоти мавриди ниёзи аввал захира шудааст?

Абдусалом Нозимов гуфт, ки бо қарори Раиси шаҳри Душанбе аз 6 майи соли равон «Дар бораи сари вақт омода намудани соҳаҳои иқтисодиёт ва иҷтимоиёти шаҳри Душанбе барои фаъолияти мунтазам ва самарабахш дар давраи тирамоҳу зимистони солҳои 2022- 2023» барои ин давра нақша тасдиқ карда шудааст.

Иҷрои нақшаи захира то 17 ноябр чунин мебошад: пиёз ба миқдори 510,0 тонна, картошка- 2232,0 тонна, шакар- 5753,7 тонна, равғани растанӣ- 724,4 тонна, орд- 831,0 тонна, биринҷ- 8,2 тонна ва ангур ба миқдори 30,0 тонна.

Дар ин муддат нақшаи захира ба андозаи 62,1 фоиз иҷро гардида, захираи маҳсулот то охири моҳи декабр давом мекунад.

Дар Душанбе 38 адад сардхонаҳо фаъолият мекунанд

Ба гуфти ҳамсуҳбати мо, ҳамзамон баҳри тару тоза нигоҳ доштан ва захира намудани маҳсулоти кишоварзӣ дар айни замон дар шаҳри Душанбе 38 адад сардхонаҳо, новобаста аз шакли моликият бо масоҳати умумии 23 ҳазору 141,0 метри мураббаъ ва бо ғунҷоиши 39 ҳазору 161,0 тонна маҳсулот фаъолият доранд.

«Бо мақсади захиракунӣ, риоя намудани тартибу қоидаҳои захирасозӣ ва нигоҳдории маҳсулот дар айни замон дар сардхонаҳои хусусии дар қаламрави шаҳри Душанбе мавҷуда маҳсулоти кишоварзӣ ва агросаноатӣ то 1 ноябри соли 2022 ба миқдори 3 ҳазору 689,0 тонна захира гардидааст», — гуфт мутахассис.


Нархи маҳсулот дар ярмаркаҳои пойтахт — дастрас

Тибқи иттилои Агентии омори ҷумҳурӣ, дар 9 моҳи соли равон дар Тоҷикистон нархи бархе маҳсулоти ғизоӣ ва хизматрасонии пулакӣ ба аҳолӣ 0,9 дарсад коҳиш ёфтааст.

Сармутахассиси Раёсати рушди иқтисод ва савдои Мақомоти иҷроияи ҳокимияти давлатии шаҳри Душанбе Абдусалом Нозимов иброз дошт, ки баргузории ярмаркаҳои мазкур ба коҳиш ёфтани нархи бисёр маҳсулоти мавриди ниёзи аввал мусоидат намудааст. Аз ҷумла, дар айни замон нархи маҳсулот дар ярмаркаҳои пойтахт чунин мебошад: як халта орд 290 сомонӣ, як кг картошка 3,5 сомонӣ, як кг пиёз 3,5 сомонӣ, сабзӣ 2,5 сомонӣ, гӯшти гов 55 сомонӣ, як литр равғани растанӣ 20 сомонӣ, шакар 8,4 сомонӣ муайян гардидааст.

Зарангези ЛАТИФ,
АМИТ «Ховар»

АКС: Хадамоти матбуоти Президенти Ҷумҳурии Тоҷикистон/АМИТ «Ховар»

Ноябрь 21, 2022 14:39

Хабарҳои дигари ин бахш

Дар Мақомоти иҷроияи ҳокимияти давлатии шаҳри Душанбе масъалаи ҳушмандсозии идораи шаҳрдорӣ баррасӣ шуд
Беҳтаринҳои соли 2022 дар дар соҳаи кор бо ҷавонон ва варзиши шаҳри Душанбе қадрдонӣ карда шуданд
ДАЪВАТИ БАҲОРӢ. Дар Душанбе ба мавсими нави даъвати шаҳрвандон ба хизмати ҳарбӣ омодагӣ мебинанд
ШАҲРИ САБЗ. Дар Душанбе 193 ҳазору 499 бех ниҳолҳои ороишӣ, сояафкан, мевадиҳанда ва буттагӣ шинонида мешаванд
Ба кормандони ҳифзи ҳуқуқ ва сохторҳои низомии Душанбе моҳияти Паёми Президенти Тоҷикистон тафсир карда шуд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Президенти Федератсияи байналмилалии шиноварӣ Ҳусейн Ал Мусаллам мулоқот намуданд
Раиси шаҳри Душанбе Рустами Эмомалӣ: «Дар пойтахт соли гузашта 14 муассисаи таҳсилоти умумӣ ва томактабӣ, 8 муассисаи тандурустӣ ва 74 корхонаю коргоҳи саноатӣ бунёд карда шудаанд»
Дар Душанбе барои баланд бардоштани маърифат ва тарбияи экологии аҳолӣ корҳои фаҳмондадиҳӣ доир карда шуданд
«ХЕЗ, ТО ҶАШНИ САДА БАРПО КУНЕМ…». Дар Душанбе иди Сада таҷлил карда мешавад
КВД «Обу корези Душанбе»: мушкилиҳои норасоии оби ошомиданӣ бартараф мешаванд
Оё мактабҳои пойтахт бо гармӣ таъминанд? Муовини Раиси шаҳри Душанбе бо вазъи зимистонгузаронии муассисаҳои таълимӣ шинос гардид
Ба кормандони Раёсати истифодабарии роҳҳои ноҳияи Исмоили Сомонӣ хӯрок ва либоси гарм тақдим гардид