Дар Ҳиндустон банкомат оид ба фурӯши тилло ба кор даромад

ДУШАНБЕ, 07.12.2022 /АМИТ «Ховар»/. Дар Ҳиндустон банкомат оид ба фурӯши тилло ба кор даромад, менависад рӯзномаи The Economic Times. Дастгоҳ ба дилхоҳ хоҳишманд имкон медиҳад, ки бо истифода аз кортҳои кредитӣ ё пластикии дебетӣ тангаҳои тилло харад. Банкомат 5 кг тиллои 24 каратро нигоҳ дошта метавонад. Барои харид кардан ҳашт намуди тангаҳо: аз 0,5 грамм то 100 грамм дастрасанд.

Хусусияти муҳими банкомат дар он аст, ки арзиши тилло дар экрани он тибқи тартиби воқеӣ мувофиқ ба тағйирёбии нархмонӣ ба ин филизи қиматбаҳо дар биржаи Лондон нав карда мешавад.

Дастгоҳ аз тарафи ширкати хусусии Ҳиндустон Goldsikka Pvt Ltd сохта шудааст. Он дорои системаи боэътимоди муҳофизат аз шикаста, кушодан мебошад ва бо камераи дохилии видеоӣ ва ҳушдордиҳии садоӣ муҷаҳҳаз шудааст. Дастгоҳ дар шаҳри Ҳайдарободи Ҳиндустон насб шудааст. Дар рӯзи аввали фаъолият банкомати «тиллоӣ» ба 20 муштарӣ хизмат расонид.

Ин аввалин чунин банкомат дар Ҳиндустон аст. Аввалин банкомати фурӯши тилло дар ҷаҳон 12 сол пеш дар Аморати Муттаҳидаи Араб пайдо шуда буд. «Автомати тиҷоратии «Gold-To-Go» («тилло бо худ»), ки бо тиллои 24-карата пӯшонида шудааст, сабиқаҳои тиллоӣ бо вазни як, панҷ, даҳ грамм ва як унсия (28,3 грамм) медиҳад», — иттилоъ дода буд ҳамон вақт рӯзномаи The National.

Азиза ДАДАБОЕВА,
АМИТ  «Ховар»

                                                                                                        АКС: pixabay