Дина Болуарте президенти нави Перу интихоб гардид

ДУШАНБЕ, 09.12.2022 /АМИТ «Ховар»/. Дина Болуарте рӯзи чоршанбе баъд аз он ки парламенти Перу Педро Кастилиоро барканор кард, ба сифати президенти нави ин мамлакат савганд ёд намуд. Радикали чапи барканоршуда камтар аз якуним сол ба ҳайси сарвари давлат кор кард, то он даме, ки вакилон дар кӯшиши сеюм ба ӯ нобоварӣ эълон намуданд, хабар медиҳад АМИТ «Ховар» бо истинод ба ТАСС.

Дина Болуарте пеш аз ҷаласаи конгресс ба сифати президенти Перу савганд ёд кард. Д. Болуарте қасам ёд кард, ки вазифаи президентиашро мувофиқи сарқонуни Перу иҷро менамояд. Ӯ ваъда дод, ки истиқлолияти кишварро ҳимоя ва Конститутсияву қонунҳои онро татбиқ мекунад. Президенти нави Перу аз рӯи касб ҳуқуқшинос буда, то кунун дар вазифаи ноиби президенти кишвар кор мекард.

Болуарте аввалин занест, ки президенти Перу интихоб шуд. Вай дар маросими савгандёдкунӣ «кӯшиши табаддулоти давлатӣ»-ро маҳкум кард ва ба «муколамаи васеъ миёни ҳамаи қувваҳои сиёсии чӣ дохили конгресс ва чӣ берун аз парламент» даъват намуд. Вай инчунин эълон кард, ки ҳукумате бояд таъсис дода шавад, ки намояндагони тамоми қувваҳои сиёсиро дар бар гирад.

Азиза ДАДАБОЕВА,
АМИТ «Ховар»

АКС аз манбаъҳои боз