Ҳаракати олимпӣ барои кумак ба зарардидагони заминларзаи Туркия ва Сурия як миллион доллари ШМА ҷудо мекунад

ДУШАНБЕ, 15.02.2023. /АМИТ «Ховар»/. Ҳаракати олимпӣ барои кумак ба ҷомеаи олимпӣ, гурезагон ва оворагон дар минтақаҳои аз заминларза осебдидаи Туркия ва Сурия як миллион доллари ШМА ҷудо мекунад, иттилоъ медиҳад АМИТ «Ховар» бо истинод ба Кумитаи миллии олимпии Тоҷикистон.

Дар пайи заминларзаи харобиоваре, ки дар Туркия ва Сурия рух дод, Кумитаи байналмилалии олимпӣ (КБО), Шӯрои олимпии Осиё (ШОО), Кумитаи олимпии Аврупо (КОА) ва Фонди паноҳандагони олимпӣ (ФПО) дар маҷмӯъ 1 миллион доллари ШМА кумак хоҳанд кард, ки ба ҷомеаи олимпӣ дар минтақаҳои аз офати табиӣ зарардида пешбинӣ шудааст.

Кумитаи байналмилалии олимпӣ ва Шӯрои олимпии Осиё ҳар кадом 250 000 доллари ШМА, Кумитаи олимпии Аврупо 250 000 евро ва Фонди паноҳандагони олимпӣ барои кумаки фаврӣ ба аҳолии маҳаллӣ ва зарардидагон дар Туркия ба маблағи 260 000 доллари ШМА ҷудо мекунанд.

«Мо бо таассуфи зиёд дар бораи талафоти фоҷиавии одамон ва харобиҳои заминларзае, ки дар минтақаи ҷанубу шарқи Туркия ва Сурия рух дод, хабар ёфтем, — гуфт президенти Кумитаи байналмилалии олимпӣ Томас Бах. — Мутаассифона, дар байни ҳалокшудагон як гурӯҳ варзишгарон ва аъзои ҷомеаи олимпӣ ҳастанд, дар ҳоле ки бисёриҳо манзилҳои худро аз даст додаанд ва инфрасохтори варзишӣ осеби ҷиддӣ дидааст. Кумаки аввалини фаврии мо дар Туркия тавассути Фонди паноҳандагони олимпӣ ва шарикони онҳо дар маҳал интиқол дода мешавад. Дар Сурия мо бо созмонҳои ғайридавлатии байналмилалӣ ва оҷонсиҳои Созмони Милали Муттаҳид, ки метавонанд ба минтақаҳои осебдида дастрасӣ дошта бошанд, ҳамкорӣ хоҳем кард. Мо фаҳмидем, ки ҳоло ниёзи бештар ба ғизо, дору ва хаймаҳост».

Бо назардошти таъсири харобиовар ба онҳо, оилаҳои онҳо ва ҷомеаи мизбон саҳми Фонди паноҳандагони олимпӣ барои кумаки башардӯстона, аз қабили таъмини либос, кӯрпа, ғизо ва манзил истифода мешавад.

АКС: Кумитаи миллии олимпии Тоҷикистон