Теъдоди маҷрӯҳшудагон бар асари заминларзаи нав дар Туркия ба 294 нафар расид

ДУШАНБЕ, 21.02.2023 /АМИТ «Ховар»/. Теъдоди маҷрӯҳшудагон дар натиҷаи заминларза, ки шоми 20 феврал дар вилояти Ҳатайи Туркия ба амал омад, ба 294 нафар расид. Тавре ки АМИТ «Ховар» бо истинод ба АБИ «Казинформ» иттилоъ медиҳад, дар ин хусус Вазири тандурустии Туркия Фахриддин Хоҷа хабар додааст.

«Дар натиҷаи ду заминларза, ки 20 феврал дар Ҳатай рух дод, 294 нафар ҷароҳат бардоштанд. Мутаассифона, ҳолати 18 нафари онҳо вазнин аст, пас аз дахолати аввалини тиббӣ онҳоро тавассути ҳаво ва замин ба Одоно ва Дёртйол бурданд. Беморхонаҳои саҳроӣ дар ҳама ноҳияҳо ба беморони мо хизмати зарурӣ мерасонанд», — иттилоъ дод Вазир дар Twitter.

Ёдовар мешавем, ки 20 феврал дар ноҳияи Дафнаи вилояти Ҳатайи Туркия заминларза бо шиддати 6,4 дараҷа ба қайд гирифта шуд. Баъдтар боз як заминларза бо шиддати 5,8 дараҷа рух дод. Дар ҷанубу шарқи Туркия хонаҳо хароб шуданд. Заминларза дар Сурия, Лубнон, Исроил, Урдун, Ироқ ва Фаластин низ эҳсос гардид.

Ҳукумати Туркия аввал эҳтимоли хатари болоравии сатҳи обро дар баҳр эълон кард, аммо баъдтар эҳтимоли ба вуҷуд омадани тӯфон рад карда шуд.

Мувофиқи маълумоти охир, дар натиҷаи таконҳои охирини зеризаминӣ дар Туркия 3 нафар ҳалок ва 213 нафар маҷрӯҳ шуданд. ВАО дар бораи панҷ нафар ҳалокшудагони заминларзаи нав дар Сурия хабар додаанд.

Дар маҷмӯъ, шумораи ҳалокшудагони заминларзаи 6 феврал дар Туркия аз 41 ҳазор нафар гузашт.

Азиза ДАДАБОЕВА,
АМИТ «Ховар»

АКС: aa.com.tr