«ДУШАНБЕ — ШАҲРИ ҶАВОНӢ». Дар ноҳияи Исмоили Сомонии пойтахт таҳти ин унвон барномаи фарҳангӣ доир шуд

ДУШАНБЕ, 14.04.2023. /АМИТ «Ховар»/. Имрўз бо ташаббуси Мақомоти иҷроияи ҳокимияти давлатии ноҳияи Исмоили Сомонии шаҳри Душанбе дар Боғи фарҳангӣ-фароғатии ба номи Садриддин Айнӣ бахшида ба Рӯзи пойтахти Ҷумҳурии Тоҷикистон таҳти унвони «Душанбе — шаҳри ҷавонӣ» барномаи фарҳангӣ баргузор гардид, хабар медиҳад АМИТ «Ховар» бо истинод ба мақомоти мазкур.

Дар оғози барномаи фарҳангӣ муовини Раиси шаҳри Душанбе Толиб Раҳимзода иштирокдоронро ба Рӯзи пойтахти Ҷумҳурии Тоҷикистон табрик намуда, таъкид кард, ки «Душанбе хонаи умеди тамоми тоҷикони дунё аст. Сокини пойтахт будан на танҳо мояи ифтихор, балки масъулияти калон доштанро тақозо менамояд».

«Барои ободию бунёдкорӣ ва тозаю озода нигоҳ доштани пойтахт, ки таъриху тамаддуни миллати моро ба ҷаҳониён муаррифӣ менамояд, ҳар яки мо масъул мебошем»,- тазаккур дод ў.

Гуфта шуд, ки шаҳри Душанбе ҳамчун пойтахти Тоҷикистони соҳибистиқлол дорои захираҳои бойи сайёҳию инфрасохтори мукаммал буда, тули солҳои охир ба макони баргузории чорабиниҳои байналмилалии сиёсию иқтисодӣ ва илмию фарҳангӣ табдил ёфта, дар таҳкиму тақвият бахшидани нуфузи байналмилалии Тоҷикистон нақши бузург дорад.

Дар идомаи чорабинӣ ҳаваскорони ҷавон ва устодони санъати тоҷик суруду таронаҳои ҷолибро дар васфи пойтахт ва зебоиҳои он, шаҳри ҷавонӣ, шаҳри орзую ормонҳои миллат, шаҳри сулҳу ваҳдат будани он манзур намуданд.

Ёдовар мешавем, ки тибқи Қонуни Ҷумҳурии Тоҷикистон «Дар бораи рӯзҳои ид» аз 1 марти соли 2005 ҳамасола шанбеи сеюми моҳи апрел дар мамлакат Рӯзи пойтахти Ҷумҳурии Тоҷикистон- шаҳри Душанбе таҷлил карда мешавад.

Имсол санаи мазкур ба 15 апрел рост омадааст.

АКС: Мақомоти иҷроияи ҳокимияти давлатии ноҳияи Исмоили Сомонии шаҳри Душанбе