Дар Хуҷанд олимпиадаи ҷумҳуриявӣ аз рӯйи фанҳои ҷамъиятӣ-гуманитарӣ баргузор шуд

ДУШАНБЕ, 25.05.2023. /АМИТ «Ховар»/. 24 май дар Муассисаи давлатии таълимии «Коллеҷи омӯзгории Донишгоҳи давлатии Хуҷанд ба номи академик Бобоҷон Ғафуров» олимпиадаи ҷумҳуриявии донишҷӯёни муассисаҳои таҳсилоти миёнаи касбӣ аз рӯйи фанҳои ҷамъиятӣ-гуманитарӣ баргузор гардид. Дар он 55 донишҷӯ аз 15 муассисаи таҳсилоти миёнаи касбӣ аз рӯйи 4 фан: забони англисӣ, таърих, забон ва адабиёти тоҷик, забон ва адабиёти рус байни ҳам рақобат намуд. Дар ин хусус ба АМИТ «Ховар» дар маркази матбуоти Вазорати маориф ва илми Ҷумҳурии Тоҷикистон хабар доданд.

Олимпиадаи ҷумҳуриявӣ бо мақсади амалӣ сохтани иқдом дар самти рушди илму маориф, махсусан, ташкили озмунҳо ва олимпиадаҳои ҷумҳуриявӣ барои баланд бардоштани сатҳи саводнокиву маърифатнокии насли ҷавон, беҳтар гардонидани сатҳу сифати таълим ва тарбияи кадрҳои ба талаботи замон ҷавобгӯ ба роҳ монда шуд.

Иштирокчиён тибқи тартиби баргузории олимпиада вобаста ба равия ва фанҳо байни худ сабқат намуданд.

Ғолибон пас аз натиҷагирии олимпиада муайян карда мешаванд.

АКС: Вазорати маориф ва илми Ҷумҳурии Тоҷикистон