«Саноатсодиротбонк» дар намоишгоҳи Форуми байналмилалии содиротии Бохтар Фуд-2023 иштирок намуд

ДУШАНБЕ, 26.05.2023 /АМИТ «Ховар»/. 25 май дар шаҳри Бохтари вилояти Хатлон 3-юмин Форуми байналмилалии содиротии Бохтар Фуд-2023 баргузор гардид, ки дар он «Саноатсодиротбонк» низ иштирок намуд, хабар доданд ба АМИТ «Ховар» дар бонки мазкур.

Филиали «Саноатсодиротбонк» дар шаҳри Бохтар аз ин майдони барои таблиғи хизматрасониҳо имконияти васеъ фароҳамоварда истифода бурда, ҳамчун сармоягузори самти саноат ва истеҳсолот миёни ташкилотҳои қарзии мамлакат хизматрасониҳои худро ба иштирокчиён ва меҳмонон муаррифӣ намуд.

Бояд тазаккур дод, ки дар ин Форум тамоми ташкилотҳо, намояндагони корпусҳои дипломатии муқими Тоҷикистон, сармоягузорон, шарикони рушд, сафоратхонаҳо ва соҳибкорону намояндагони корхонаҳои истеҳсолии ватанӣ иштирок намуданд.

Форум ду рӯз давом кард ва тибқи тартиби муқарраргардида рӯзи якуми он вохӯриҳою шиносоӣ бо истеҳсолкунандагон сурат гирифта, вазъи истеҳсолу содирот дар ҷумҳурӣ ва ба ин монанд масъалаҳо баррасӣ гардиданд.

Рӯзи дуюми Форум намоишгоҳи молу маҳсулоти истеҳсоли ватанӣ ва ташкилотҳои қарзие, ки ҳамчун сармоягузори дохилӣ корхонаҳои истеҳсолӣ ва саноату истеҳсолотро маблағгузорӣ менамоянд, бо ташкили гӯшаҳои алоҳида маҳсулоти худро муаррифӣ намуданд.

АКС: «Саноатсодиротбонк»