Дар шаҳри Чаншаи музофоти Хунани Чин давоми як шабонарӯз то 10000 тонна партови сахти маишӣ коркард мегардад

ДУШАНБЕ, 19.06.2023. /АМИТ «Ховар»/. Тавре қаблан иттилоъ додем, ҳайати Федератсияи иттифоқҳои касабаи мустақили Тоҷикистон дар шаҳри Чаншаи музофоти Хунани Ҷумҳурии Мардуми Чин дар омӯзиш барои кормандони иттифоқҳои касабаи давлатҳои Осиёи Марказӣ дар мавзӯи «Интернет+ профсоюз» иштирок доранд.

Хабарнигори АМИТ «Ховар» София Шоик аз шаҳри Чанша иттилоъ медиҳад, ки дар доираи омўзиш ҳайати мазкур бо фаъолияти корхонаи коркарди партов «Hunan Junxin Environmental Protection Co., Ltd» –и ин шаҳр шинос шуд.

Нахуст барои кормандони иттифоқҳои касабаи давлатҳои Осиёи Марказӣ ҳамоиш оид ба нақш ва ҳаракати иттифоқҳои касаба дар корхонаи коркарди партов доир гардид.

Дар ҳамоиш иброз гардид, ки баҳри таъмини сатҳи зиндагии шоистаи кормандон дар ширкат тамоми тадбирҳои зарурӣ андешида шудааст. Ҳамзамон барои ҷалби кормандони ҷавон коргоҳи мазкур бо донишгоҳҳои олӣ ҳамкорӣ намуда, хатмкунандагонро бо ҷои кор таъмин менамояд.

Корхонаи мазкур дар самти сармоягузорӣ, сохтмон, таҳқиқот ва таҳияи технологӣ, истифода ва идораи коркарди партовҳои сахти маишӣ фаъолият менамояд. Дар корхона дар як шабонарӯз то 10000 тонна партовҳои сахти маишӣ коркард карда мешаванд.

Ин иқдом натанҳо барои беҳдошти муҳити зист ва нест намудани партовҳои сахти маишӣ роҳандозӣ гардидаст, балки барои тавлиди «энергияи сабз» низ мусоидат менамояд.

АКС: АМИТ «Ховар»