Шумораи гирифторони бемории сурхакон дар пойтахти Британия метавонад ба даҳҳо ҳазор нафар расад

ДУШАНБЕ, 17.07.2023 /АМИТ «Ховар»/. Агентии амнияти тандурустии Британия (UKHSA) ҳушдор додааст, ки бинобар сатҳи пасти эмкунӣ дар Лондон  шумораи бемории сурхакон метавонад ба даҳҳо ҳазор расад. Ҳисобҳои математикӣ нишон медиҳанд, ки авҷи беморӣ метавонад аз 40 000 то 160 000 нафарро фаро гирад. Тавре АМИТ «Ховар» иттилоъ медиҳад, дар ин хусус АЗЕРТАҶ бо истинод ба BBC  хабар додааст.

Сатҳи баланди эмкунӣ дар қисмати боқимондаи Британия маънои онро дорад, ки дар ҷойҳои дигар хатари бемории ҷиддӣ ба таври назаррас камтар аст. Аммо UKHSA изҳор намудааст, ки барои эмгузаронии кӯдакон, наврасон ва ҷавонон зарурати «фаврӣ» мавҷуд аст.

Фарогирии эмгузаронӣ аз бемории сурхакон, паротити эпидемиявӣ  ва сурхча (MMR) дар Британияи Кабир тайи даҳсолаи охир дар сатҳи пасттарин қарор дорад: тақрибан ҳар даҳумин кӯдак то замони ворид шудан ба мактаби ибтидоӣ бе ҳимоя аст.

Эмкунӣ инчунин аввали солҳои 2000-ум, замоне ки тасдиқи иртибот байни ваксинаи омехтаи MMR ва аутизм ба таври васеъ паҳн гардид, коҳиш ёфт. Баъдан ин назария комилан беэътибор гардид ва духтур Эндрю Уэйкфилд, ки ин ғояро пеш мебурд, аз феҳристи тиббӣ хориҷ шудааст.

Аммо сурхакон —  яке аз бемориҳои сирояткунандае аст, ки дар илми тиб маълум буда, шумораи зиёди одамон ба ин намуди беморӣ иммунитети кофӣ надоранд. Мувофиқи қолабҳои UKHSA ва Мактаби беҳдошт ва тибби тропикии Лондон, шумораи гирифторони бемории сурхакон дар пойтахти Британия метавонад ба даҳҳо ҳазор нафар расад.

Ин хатари назариявӣ мебошад. Ин маънои онро надорад, ки Лондон дар остонаи хуруҷи бемории сурхакон қарор дорад. Аммо имсол аллакай 128 ҳолат дар муқоиса бо 54 ҳолати соли 2022 ба қайд гирифта шудааст.

Азиза ИКРОМ,
АМИТ «Ховар»

АКС: АЗЕРТАҶ