Дар Душанбе бо мақсади пешгирӣ ва рафъи оқибатҳои ҳолатҳои фавқулода вохӯрӣ доир шуд

ДУШАНБЕ, 19.09.2023. /АМИТ «Ховар»/. Раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон, генерал-полковники милитсия Рустам Назарзода бо Сафири Фавқулода ва Мухтори Подшоҳии Муттаҳидаи Британияи Кабир ва Ирландияи Шимолӣ дар Ҷумҳурии Тоҷикистон Тим Ҷонс вохӯрӣ намуд, хабар доданд ба АМИТ «Ховар» дар Кумитаи ҳолатҳои фавқулода ва мудофиаи гражданӣ.

Зимни вохӯрӣ раиси Кумита ба меҳмон дар бораи корҳо дар соҳаи идоракунии ҳолатҳои изтирорӣ дар ҷумҳурӣ, инчунин ҳамкории байналмилалӣ бо сохторҳои дахлдори давлатҳои хориҷӣ дар ин самт маълумот дод.

Раиси Кумита иброз дошт, ки ҳадаф аз баргузории мулоқот амалӣ намудани ҳамкории дуҷониба дар самти огоҳӣ, пешгирӣ, рафъи оқибатҳои ҳолатҳои фавқулода ва расонидани кумакҳои башардӯстона ба аҳолии мамлакат бинобар офатҳои табиӣ мебошад.

Мавсуф иброз изҳор намуд, ки ҳамасола дар Ҷумҳурии Тоҷикистон бориши шадид, сел, ярч, фаромадани тарма ва заминларза рух медиҳанд, ки ба аҳолӣ ва иқтисодиёти мамлакат хисороти ҷиддӣ мерасонанд.

Тазаккур дода шуд, ки Ҷумҳурии Тоҷикистон ҷиҳати татбиқи ҳадафҳо ва афзалияти глобалии чаҳорчӯбаи Сендай оид ба коҳиш додани хатари офатҳои табиӣ якчанд тадбирҳо меандешад.

Яке аз ҳадафҳои глобалии чаҳорчӯбаи Сендай барои давлатҳои иштироккунанда қабули стратегияҳои миллии коҳиши хатари офатҳои табиӣ мебошад.

«Ҷумҳурии мо бо иштироки коршиносони байналмилалии СММ дар байни давлатҳои минтақа аввалин шуда, Стратегияи миллии коҳиш додани хатари офатҳои табиӣ барои солҳои 2019-2030-ро таҳия ва тасдиқ намуд», — таъкид дошт Раиси Кумитаи ҳолатҳои фавқулода ва мудофиаи гражданӣ.

Дар ҷараёни вохӯрӣ инчунин масъалаи ташкили машғулияти омӯзишӣ, ки барои такмили ихтисоси кормандон ҳатмӣ мебошанд, муҳокима шуд. Инчунин ҷонибҳо самтҳои эҳтимолии ҳамкорӣ ва пешниҳодҳо оид ба иқдоми минбаъдаро баррасӣ намуданд.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон