Дар Агентии «Тоҷикстандарт» бахшида ба Рӯзи Конститутсияи Тоҷикистон ҳамоиш доир шуд

ДУШАНБЕ, 05.11.2023. /АМИТ «Ховар»/. Бахшида ба таҷлили Рӯзи Конститутсияи Ҷумҳурии Тоҷикистон дар Агентии «Тоҷикстандарт» бо иштироки кормандони агентӣ ҷамъомади тантанавӣ баргузор гардид. Дар ин хусус ба АМИТ «Ховар» дар Агентии «Тоҷикстандарт» хабар доданд.

Иштирокдорон оид ба моҳият ва арзиши волои Конститутсия ҳамчун рукни муқаддаси асосии давлатдорӣ ва баланд бардоштани фарҳанги сиёсӣ, ҳувияти миллӣ ва ҳисси ватандӯстиву худшиносӣ сухан гуфтанд.

Таъкид шуд, ки бо назардошти аҳамияти бузурги ин санади олии ҳуқуқӣ дар пешрафти ҳаёти ҷомеа ва давлат дар назди ҳар фарди солимфикру огоҳи мамлакат, аз ҷумла, кормандони Агентии Тоҷикстандарт имрӯз вазифаҳои басе муҳим ва масъулиятнок қарор доранд, ки омӯзиш, тарғибу ташвиқи мазмун ва моҳияти Конститутсия ва қонунҳои дигари амалкунанда аз ҷумлаи онҳо мебошанд. Зеро танҳо бо ҳамин роҳ мо метавонем шуури ҳуқуқӣ ва фарҳангӣ, қонунфаҳмиву қонуншиносии қишрҳои гуногуни ҷомеа, бахусус ҷавонони мамлакат ва масъулияти онҳоро барои ояндаи шукуфои Ватани азизамон — Тоҷикистон баланд бардорем.

Ҳамзамон гуфта шуд, ки ҳоло аз ҳар яки мо тақозо мешавад, ки ба манфиати Ватан, давлат ва халқи худ софдилонаву содиқона кору зиндагӣ намуда, тамоми кӯшишу ғайрати худро барои пешрафти давлати мустақили тоҷикон, таҳкими минбаъдаи мавқеъ ва эътибори Ватани азизамон дар арсаи байналмилалӣ равона созем.

АКС: Агентии «Тоҷикстандарт»