Бунёди бинои баландошёна дастрасии сокинони шаҳри Хоруғро ба манзили истиқоматӣ осон мегардонад
ХОРУҒ, 08.12.2023 /АМИТ «Ховар»/. Дар шаҳри Хоруғ бунёди нахустин бинои 14-ошёна идома дошта, дар назар аст, ки тобистони соли оянда мавриди баҳрабардорӣ қарор гирад. Қабл аз ин чанд бинои 9 ва 12-ошёна ба истифода дода шуданд, аммо ин аввалин бино 14-ошёна аст.
Муовини Раиси шаҳри Хоруғ Файзулло Назархудозода ба мухбири минтақавии АМИТ «Ховар» Файз Мирасан гуфт, ки «бо мақсади рушди инфрасохтори маркази маъмурии вилоят- шаҳри Хоруғ Ҳукумати Ҷумҳурии Тоҷикистон дар даврони сохибистиклолии ҷумҳурӣ корҳои зиёди созандагию ободкорӣ анҷом дода, ба масъалаи бо хонаи истиқоматӣ таъмин намудани сокинони шаҳр таваҷҷуҳи хосса равон намуд. Зеро аз аввали солҳои навадум то даҳаи аввали соли дуҳазорум шумораи сокинони дар навбати хона сабтшуда бамаротиб зиёд гардид, аммо Хоруғ як шаҳри хурди камзамин аст. Ҳукумати Ҷумҳурии Тоҷикистон бо мақсади таъмини ҳарчӣ бештари аҳолӣ бо хона биноҳои баландошёна бунёд менамояд. Яке аз чунин биноҳо, ки алҳол сохтмони он дар сероҳаи хиёбони марказӣ идома дорад ва бояд тобистони соли оянда ба истифода дода шавад, ин бинои 14-ошёнаи истиқоматӣ мебошад».
Сохтмони ин бино, ки бар уҳдаи Ҷамъияти дорои масъулияти маҳдуди «Помирсоз» гузошта шудааст, аз моҳи сентябри соли 2020-ум оғоз гардид ва ҳоло ба марҳилаи охири худ наздик аст. Бинокорон, ки шумораашон аз 50 нафар бештар аст, ҳоло ба корҳои андовакунӣ ва ороиши дохили ҳуҷраҳо машғул мебошанд. Дар шаҳри Хоруғ ин нахустин бинои 14-ошёна аст, аз ин рӯ ҳайати муҳандисон ва бинокорон талош меварзанд, ки биноро дар асоси риояи ҳамаи талаботи технологияи муҳандисию зилзилашиносӣ бунёд намоянд.
Ба гуфтаи сохмончиён, дар сохтмон бештар аз хишт истифода шудааст, ки гармиро дар фасли зимистон ва баръакс, сардиро дар фасли гармо нигоҳ медорад. Дар шароити иқлими сарди вилоят барои ҳар сокини минтақа гармии хона аз ҳама муҳим мебошад.
Ба гуфтаи роҳбари Ҷамъияти дорои масъулияти маҳдуди «Помирсоз», ин бино аз 140 хонаи як, ду ва сеҳуҷрадор иборат аст ва ҳамаи хонаҳо дар асоси меъёрҳои мутобиқ ба замони муосири сохтмонӣ сохта шудаанд. Бунёди ин бинои муосир дар доираи барномаҳои марҳилаи нави рушди вилоят сохта шуда, ҳадафи ниҳоии сохтмони он дастрасии аҳолӣ ба хонаҳои нави истиқоматии замонавӣ мебошад.
Бунёд гардидани чунин иншоот, ки ҳам дорои хонаҳои истиқоматӣ ва ҳам марказҳои хизматрасонӣ мебошанд, ба боз ҳам беҳтар гардидани вазъи иҷтимоии сокинони шаҳр мусоидат менамояд.
АКС: АМИТ «Ховар»
Дар вилояти Суғд Форуми дуюми сулҳи Фарғона доир мешавад
Сафири Тоҷикистон бо донишҷӯён ва омӯзгорони Донишгоҳи давлатии Ош мулоқот намуд
Дар Коллеҷи омори шаҳри Ваҳдат оид ба рушд ва такмили низоми омори миллӣ дар замони соҳибистиқлолӣ конференсияи ҷумҳуриявӣ доир шуд
Дар Маркази рушди ҳунармандӣ ва малакаҳои касбии муосир ба шаҳрвандон ройгон касб омӯзонида мешавад
Ба ифтихори дохил гардидани Резервати биосферии Ромит ба Шабакаи ҷаҳонии мамнуъгоҳҳои биосферии ЮНЕСКО конфронс доир шуд
Дар ноҳияи Бобоҷон Ғафуров бунгоҳи тиббӣ, муассисаи таълимӣ ва маркази ташхисӣ ба истифода дода шуданд
Ҳайати Тоҷикистон дар ҷаласаи Шурои роҳбарони мақомоти муҳоҷиратии давлатҳои аъзои ИДМ иштирок намуд
Дар ноҳияи Спитамен иншооти таъйиноти гуногун мавриди истифода қарор дода шуданд
«ФУТБОЛ — ОМИЛИ ВАҲДАТ ВА ҲАМДИЛИИ ҶАВОНОН». Байни устодону кормандони Донишгоҳи миллии Тоҷикистон мусобиқаи футболи хурд доир гардид
Дар солҳои соҳибистиқлолӣ дар шаҳру ноҳияҳои Суғд 986 муассисаи таълимӣ ба истифода дода шуд
Дар вилояти Суғд лоиҳаҳои бузург дар соҳаи роҳу нақлиёт амалӣ гардиданд
Бо саҳми соҳибкорон ва шахсони саховатпеша дар Суғд 5 ҳазору 500 километр роҳҳои маҳаллӣ таъмиру навсозӣ карда шуданд
