«МОҲИИ ТИЛЛОӢ». Дар Душанбе барои кӯдакон барномаи фарҳангӣ-фароғатӣ доир шуд

ДУШАНБЕ, 29.12.2023. /АМИТ «Ховар»/. Имрӯз бо дастгирии Раиси шаҳри Душанбе дар бинои Сирки давлатии Тоҷикистон таҳти унвони «Моҳии тиллоӣ» барномаи фарҳангӣ-фароғатии кӯдакона доир гардид, хабар медиҳад АМИТ «Ховар» бо истинод ба шуъбаи иттилоотии дастгоҳи Раиси шаҳри Душанбе.

Намоиши фарҳангӣ-фароғатии кӯдакона бо мақсади фароҳам овардани шароити мусоиди фароғатӣ барои наврасони пойтахт баргузор шуд.

Дар он 2500 кӯдаки ятим, нимятим, аз оилаҳои ниёзманд ва наврасони фаъоли пойтахт иштирок доштанд.

Воқеаву рӯйдодҳои намоиши “Моҳии тиллоӣ” дар саҳнаи Сирки давлатӣ бо ороишоти афсонавӣ ба таври хотирмону таъсирбахш доир шуда, он аз ҷониби ансамблҳои рақсии кӯдаконаи «Ғунчаҳои пойтахт», «Лаъл», «Меҳрона», «Гулрез», «Зебо», Мактаби бачагонаи санъат ба номи Аминзодаи назди Раёсати фарҳанги шаҳри Душанбе, дастпарварони Маркази кӯдакону наврасони шаҳри Душанбе, Сирки давлатӣ ва дигар марказҳои фарҳангиву таҳсилотии пойтахт пешниҳод гардид.

АКС: Шуъбаи иттилоотии дастгоҳи Раиси шаҳри Душанбе