ФАО: моҳи декабр нархи ҷаҳонии озуқаворӣ поён рафт

ДУШАНБЕ, 09.01.2024 /АМИТТ «Ховар»/. Нархҳои ҷаҳонии озуқаворӣ моҳи декабр нисбат ба моҳи гузашта 1,5 фоиз поён рафта, нархи байналмилалии шакар якбора коҳиш ёфт. Тавре АМИТ «Ховар» иттилоъ медиҳад, дар ин хусус АЗЕРТАҶ бо истинод ба Ташкилоти озуқаворӣ ва кишоварзӣ (ФАО) хабар додааст.

Нишондиҳандаи ФАО дар муқоиса бо моҳи декабри соли гузашта 10,1 дарсад коҳиш ёфтааст.

Нархи ғалладона – гандум, ҷуворимакка, биринҷ ва ҷав – 1,5 фоиз боло рафт. Тавре ки дар ФАО ишора мегардад, ин қисман ба нокомиҳои логистикӣ вобаста мебошад, ки ба таъминот аз кишварҳои асосии содиркунанда халал мерасонад. Аммо нархи миёна барои ғалладонагиҳо низ дар 12 моҳ нисбат ба соли гузашта 15,4 фоиз коҳиш ёфтааст.

Равғани растанӣ нисбат ба моҳи ноябр 1,4 фоиз арзонтар шуд ва дар маҷмуъ соли 2023 ин рақам аз сатҳи соли гузашта 32,7 фоиз коҳиш ёфт.

Нархи шакар нисбат ба моҳи ноябр 16,6 фоиз коҳиш ёфта, ба ҳадди ақалли нуҳмоҳа расид, гарчанде ки ин нишондиҳанда то ҳол аз сатҳи декабри соли 2022 14,9 фоиз баландтар аст.

Нишондиҳандаи нархи гӯшт нисбат ба моҳи ноябри соли равон 1 дарсад ва нисбат ба моҳи декабри соли 2022 1,8 дарсад коҳиш ёфт.

Бар хилофи тамоюли умумӣ нархи маҳсулоти ширӣ нисбат ба моҳи ноябр 1,6 фоиз афзудааст, гарчанде ки арзиши он то ҳол аз моҳи декабри соли 2022  16,1 фоиз камтар аст.

Афзоиши якмоҳа бо сабаби баланд шудани нархҳои равған ва панир, ки ба талаботи зиёди истеъмолкунандагон дар арафаи мавсими ид дар Аврупои Ғарбӣ мусоидат менамуд, ба амал омад.

Дар айни замон талаботи баланди воридоти ҷаҳонӣ ба афзоиши таъминоти байналмилалии шири хушк оварда расонид, гуфта мешавад дар гузориши ФАО.

Азиза ИКРОМ,
АМИТ «Ховар»

Акс: АЗЕРТАҶ