ТАҚВИМИ АМИТ «ХОВАР»: имрӯз 8 январ, душанбе, 8-умин рӯзи соли 2024 аст

Дар ин рӯзи соли 1861 дар Империяи Русия аввалин шумораи рӯзномаи «Вокруг света» («Дар гирди ҷаҳон») нашр шуд.

***

8 январи соли 1912 Конгресси миллии Африқо таъсис дода шуд.

***

63  сол муқаддам, 8 январи соли 1961 франсузҳо дар раъйпурсӣ барои таъмини истиқлоли Алҷазоир овоз доданд.

***

Дар ин рӯзи соли  2010 дар пойтахти Салвадор қариб баъди ним асри танаффус Сафорати Куба ифтитоҳ шуд.

***

8 январи соли 2013 лоиҳаи «Кумаки техникӣ оид ба дастгирии ислоҳоти тандурустӣ дар Тоҷикистон» оғоз гардид.

***

8 январи соли 2015 Президенти Ҷумҳурии Тоҷикистон муҳтарам Эмомалӣ Раҳмон ба Ҷамоати деҳоти Султонободи ноҳияи Рӯдакӣ ташриф оварда, дар ҳашари умумии ниҳолшинонӣ иштирок намуданд.

***

9 сол пеш, 8 январи соли 2015 Сарвари давлат муҳтарам Эмомалӣ Раҳмон дар робита ба ҳамлаи хиёнаткоронаи террористӣ ба идораи ҳайати таҳририяи маҷаллаи «Шарли Эбдо» дар Париж, ки 12 нафар  ба ҳалокат расиданд,  ба Президенти вақти Ҷумҳурии Фаронса Франсуа Жерар Жорж Олланд барқияи тасаллият ирсол намуданд.

***

Дар ин рӯзи соли 2016 муносиботи дуҷонибаи Тоҷикистон ва Туркия дар самти мубориза бо ҷиноятҳои фаромиллӣ муҳокима гардиданд.

***

Соли 2018 Лигаи футболи  Тоҷикистон сомонаи расмии интернетии  худро бо суроғаи www.tfl.tj  ва www.flt.tj ифтитоҳ намуд.

8 ЯНВАР ТАҶЛИЛ МЕШАВАД:

Дар Ҷазираҳои шимолии Мариана – Рӯзи Иттиҳод.