Дар Филиппин теъдоди бар асари ярч ҳалокшудагон ба 68 нафар расид

ДУШАНБЕ, 13.02.2024 /АМИТ «Ховар»/. Шумораи бар асари фаромадани ярч ҳалокшудагон дар вилояти Даваои тиллоӣ дар ҷануби Филиппин ба 68 нафар расид, 51 нафари  дигар гумшуда ҳисобида мешаванд. Тавре АМИТ «Ховар» бо истинод ба ТАСС иттилоъ медиҳад, дар ин хусус шабакаи телевизионии ABS-CBN News хабар додааст.

Мақомоти маҳаллӣ изҳор менамоянд, ки ҷустуҷӯи шахсони ҳалокгардида идома меёбад. Аммо наҷотдиҳандагон дигар боварӣ надоранд, ки тақрибан пас аз як ҳафтаи фаромадани ярч дигар касе зинда пайдо шавад.  Охирин нафаре, ки 9 феврал аз зери харобаҳо берун оварда шуд, духтари сесола буд. Кӯдак тақрибан 60 соат дар зери харобаҳо қарор доштааст.

Ба амалиёти ҷустуҷӯӣ дар ҳудуди 9 гектар садҳо нафар ва техникаи вазнин ҷалб гардидаанд. Баландии сел метавонад аз 30 то 50 метрро ташкил диҳад. Ёдовар мешавем, ки ярчфароӣ 6 феврал рух дода, зиёда аз 50 хона ва автобусҳоро, ки кормандони ширкати истихроҷи тиллои маҳаллиро интиқол медоданд, пахш намуд.

АКС аз манбаъҳои боз