Дар Ашт бинои нави Муассисаи таҳсилоти миёнаи умумии №25 ба истифода дода шуд

ДУШАНБЕ, 14.04.2024 /АМИТ «Ховар»/. Дар ноҳияи Ашт бинои нави Муассисаи таҳсилоти миёнаи умумии №25 ба истифода дода шуд. АМИТ «Ховар» бо истинод ба хадамоти матбуоти Раиси вилояти Суғд иттилоъ медиҳад, ки мактаби нав дар доираи сафари кории Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба вилояти Суғд мавриди истифода қарор дода шуд.

Дар маросими баистифодадиҳии бинои нави таълимӣ иброз гардид, ки Ҳукумати Ҷумҳурии Тоҷикистон ба рушди соҳаи маориф таваҷҷуҳи хосса зоҳир намуда, барои фароҳамсозии шароити арзандаи таълиму тарбия аз тамоми имконият истифода менамояд.

Бинои нави Муассисаи таҳсилоти миёнаи умумии №25 дар деҳаи Ашти деҳоти Ашт барои 800 хонанда дар ду баст сохта шудааст.

Он аз 4 ошёна иборат буда, дорои 20 синфхонаи таълимӣ, ошхона бо 100 ҷой, 2 синфхона — озмоишгоҳи замонавӣ, толори замонавии варзишӣ, майдончаи варзишӣ барои футбол ва маҷлисгоҳ бо 200 ҷой мебошад.

Муассисаи давлатии «Маркази татбиқи лоиҳа, сохтмон ва муҷаҳҳазгардонии мактабҳо» фармоишгари иншоот ва Ҳукумати Ҷумҳурии Тоҷикистон, шарикони рушд (Фонди Саудии Рушд) ва пудратчӣ ҶДММ «ТИСМ» аз маблағгузорон мебошанд.

АКС: Хадамоти матуботи Раиси вилояти Суғд