Дар Донишгоҳи славянии Русияву Тоҷикистон вобаста ба аҳамияти ҳифзи пиряхҳо конференсияи байналмилалӣ баргузор гардид

Апрель 3, 2024 11:03

ДУШАНБЕ, 03.04.2024 /АМИТ «Ховар»/. Дар Донишгоҳи славянии Русияву Тоҷикистон дар мавзуи «Аҳамияти байналмилалӣ ва таърихии ибтикори ҷаҳонии Ҷумҳурии Тоҷикистон дар соҳаи об ва Соли 2025- соли байналмилалии ҳифзи пиряхҳо конференсияи байналмилалии илмӣ-амалӣ баргузор шуд, хабар медиҳад АМИТ «Ховар» бо истинод ба Маркази омӯзиши пиряхҳои Академияи миллии илмҳои Тоҷикистон.

Дар конференсия сиёсатмадорон, олимон, муҳаққиқони дохилу хориҷи мамлакат, намояндагони корпусҳои дипломатии Осиёи Марказӣ ва Федератсияи Русия, намояндагони вазорату идораҳои ҷумҳурӣ иштирок доштанд.

Директори Маркази омӯзиши пиряхҳо Абдулҳамид Қаюмов дар мавзуи «Ҷумҳурии Тоҷикистон – пешоҳанг дар самти омӯзиш ва ҳифзи пиряхҳо» маъруза намуда, иброз дошт, ки таҳлили адабиёти илмӣ оид ба ҳолати омӯзиши пиряхҳои  ҳудуди Ҷумҳурии Тоҷикистон нишон медиҳад, ки дар аввали солҳои 90-ум дар ҳудуди Ҷумҳурии Тоҷикистон таҳқиқоти илмӣ-бунёдӣ гузаронида нашуда, бинобар даргириҳои дохилӣ шароити гузаронидани он низ вуҷуд надошт.

Президенти Тоҷикистон муҳтарам Эмомалӣ Раҳмон ҳолати воқеӣ оид ба омӯзиши пиряхҳоро ба назар гирифта, дар асоси сиёсати созандаю бунёдкорона ва ҳамзамон таҳлили амиқи ҳаматарафа супориш доданд, ки дар  Академияи миллии илмҳои Тоҷикистон Маркази омӯзиши пиряхҳо таъсис дода шавад ва он бояд таҳқиқоти бунёдиро  бо усулҳои муосири инноватсионӣ гузаронад. Вазифаи аввалиндараҷаи марказ- муайян намудани шумора, ҳаҷм ва ҳолати пиряҳо дар равиши тағйирёбии иқлим дар асосӣ таҳқиқоти бунёдӣ буд.

Абдулҳамид Қаюмов афзуд, ки «пойгоҳи пиряхи Федченко имрӯз фаъолият намекунад, лекин хушбахтона, ин марказ дар айни замон 6 пойгоҳи баландкӯҳро дар баландиҳои аз 3800 то 4899 метр ҷойгир намудааст, ки тавассути онҳо пиряхҳо таҳти назорати доимӣ қарор доранд. Маркази омӯзиши пиряхҳо масъулиятро дар самти омӯзиш ва ҳифзи пиряхҳо боз ҳам ҷоннок намуда, ҳамзамон ба таври пайваста бо  иштироки олимону мутахассисони соҳавӣ Стратегияи гузаронидани чорабиниҳои илмӣ- амалӣ оид ба соли 2025 Соли байналмилалии ҳифзи пиряхҳо ва Барномаи гузаронидани корҳои илмӣ- таҳқиқотӣ ва экспедитсионӣ ҷиҳати ташкил ва гузаронидани соли 2025 ҳамчун Соли байналмилалии ҳифзи пиряхҳоро таҳия намуда, ба Ҳукумати Ҷумҳурии Тоҷикистон  барои баррасӣ  пешниҳод намудааст. Ин дар сиёсати имрӯзаи Ҷумҳурии Тоҷикистон дастоварди назаррас аст.

Гуфта шуд, ки Маркази омӯзиши пиряхҳо Феҳристи пиряхҳои системаи Федченкоро бо дастгирии Президенти мамлакат бо истифода аз технологияи муосири харитасозӣ чоп намудааст.

Баргузории ин конференсия барои иштирокчиёни он чун минбари байналмилалии илмӣ-амалӣ баҳри ҳамкорӣ, табодули таҷриба ва усулҳои омӯзиши криосфера ва илми пиряхшиносӣ хизмат намуд.

АКС: Маркази омӯзиши пиряхҳои Академияи миллии илмҳои Тоҷикистон

Апрель 3, 2024 11:03

Хабарҳои дигари ин бахш

Байни Донишгоҳи давлатии омӯзгории Тоҷикистон ва Донишгоҳи миллии илмҳои компютерӣ ва рушдёбандаи Покистон созишномаи ҳамкорӣ ба имзо расид
Академияи идоракунии давлатии Тоҷикистон бо ширкати «Really English»-и Британия ҳамкорӣ менамояд
Сулаймон Зиёзода дар Муколамаи Рим оид ба масъалаҳои об-2025 мавқеи Тоҷикистонро дар самти истифодаи устувори захираҳои об таъкид намуд
Вазири маориф ва илми Тоҷикистон дар Конгресси якуми ҷаҳонӣ оид ба таҳсилоти фарогир дар Алмато иштирок намуд
Соли 2028 дар Тоҷикистон Конфронси Созмони Милали Муттаҳид оид ба захираҳои об баргузор мешавад
Тоҷикистону Қирғизистон дар самти такмили ихтисоси кормандони соҳаи маориф Ёддошти тафоҳум ба имзо расониданд
Қабули ҳуҷҷатҳо барои иштирок дар Стипендияи байналмилалии «Дурахшандагон» оғоз гардид
Омӯзгорону кормандони соҳаи маориф дар Федератсияи Русия табодули таҷриба намуданд
Оид ба нақши дипломатияи тоҷик дар таҳкими сиёсати хориҷӣ конфронс доир шуд
Дар Донишгоҳи байналмилалии сайёҳӣ ва соҳибкории Тоҷикистон Иди Меҳргонро таҷлил намуданд
Донишгоҳи байналмилалии сайёҳӣ ва соҳибкории Тоҷикистон дар 9 моҳи соли 2025 фаъолияти назаррас дошт
Хонандагони Хуҷанд ба омӯзиши нозукиҳои илми робототехника ва зеҳни сунъӣ фаро гирифта шуданд