Донишгоҳи байналмилалии забонҳои хориҷии Тоҷикистон ва Донишгоҳи давлатии омӯзгории Бошқирдистон шартномаи ҳамкорӣ ба имзо расониданд

ДУШАНБЕ, 18.04.2024 /АМИТ «Ховар»/. Дар Донишгоҳи байналмилалии забонҳои хориҷии Тоҷикистон ба номи Сотим Улуғзода бо ректори Донишгоҳи давлатии омӯзгории Бошқирдистон ба номи Мифтахетдин Акмулли Салават Сагитов вохӯрӣ баргузор гардид. Дар ин хусус АМИТ «Ховар» бо истинод ба ин донишгоҳ хабар медиҳад.

Дар мулоқот муовини Ректор оид ба таълим Зулфия Мирзода дар бораи ҳамкории судманди Ҷумҳурии Тоҷикистон ва Федератсияи Русия дар самти маориф ва илм сухан гуфта, аз созишномаҳои гуногунҷабҳаи донишгоҳ бо муассисаҳои таҳсилоти олии Федератсияи Русия изҳори хушнудӣ намуд.

Зимни мулоқот тарафҳо дар бораи тақвияти ҳамкорӣ  дар самти тайёр намудани омӯзгорони фанҳои забон ва адабиёти рус дар ҳама зинаи таҳсил ва мубодилаи донишҷӯёну омӯзгорон ибрози назар намуданд.

Дар мулоқот байни Донишгоҳи байналмилалии забонҳои хориҷии Тоҷикистон ба номи Сотим Улуғзода ва Донишгоҳи давлатии омӯзгории Бошқирдистон шартномаи ҳамкорӣ ба имзо расид.

Дар охир ҳамчун рамзи меҳмоннавозии тоҷикона ба меҳмонон туҳфаи хотиравӣ тақдим гардид.

АКС: Донишгоҳи байналмилалии забонҳои хориҷии Тоҷикистон ба номи Сотим Улуғзода