«ИСТИҚБОЛИ САРБОЗИ ВАТАН ШАРАФ АСТ!». Дар шаҳру ноҳияҳои вилояти Суғд ин иқдомро ҷонибдорӣ менамоянд

ДУШАНБЕ, 10.05.2024. /АМИТ «Ховар»/. Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳудуди мамлакат иқдоми ҷумҳуриявии «Истиқболи сарбози Ватан шараф аст!» идома дорад. Аз ҷумла, дар шаҳру ноҳияҳои вилояти Суғд ин ташаббусро дар фазои орому осудаи Ватан баргузор менамоянд.

Дар ноҳияи Бобоҷон Ғафурови вилояти Суғд низ ҷавонмардонеро, ки қарзи шаҳрвандӣ- хизмат дар сафи Артиши миллии Ҷумҳурии Тоҷикистонро ба анҷом расонида, сарбаландона ба назди волидайн баргаштаанд, бо суруру шодмонӣ истиқбол мегиранд.

Дар фазои тантанавии истиқболи сарбозони далери Ватан дар манзили истиқоматиашон барои садоқатмандона ҷамъбаст намудани хизмати аскарӣ ва тарбияи чунин ҷавонмардони ватандӯст ба волидони онҳо изҳори сипосу миннатдорӣ намуда, ба сарбозон туҳфаву сипоснома супорида мешаванд.

Бояд таъкид намуд, ки чунин иқдом дар шаҳри Истаравшан низ идома дорад. Ҷавонмардони сарбаланде, ки қарзи шаҳрвандӣ- хизмат дар сафи Артиши миллии Ҷумҳурии Тоҷикистонро ба анҷом расонида, ба назди волидайн баргаштаанд, бо суруру шодмонӣ истиқбол гирифта мешаванд.

Гуфта мешавад, ки ҳимояи марзу буми Ватан ва обод гардонидани он вазифаи имониву виҷдонии ҳар шаҳрванди мамлакат, бахусус ҷавонони бонангу номуси миллати тоҷик ба ҳисоб меравад. Он ҳамчун омили муҳими тарбияи ватандӯстӣ ва рукни асосии ҷавонмардӣ аз насл ба насл ба мерос мондааст.

Ҳамзамон дар ноҳияи Айнии вилояти Суғд ин ташаббусро ҷонибдорӣ намуда, ҷавонони бонангу номусеро, ки адои хизмат намудаанд, бо тантана пешвоз мегиранд. Зеро имрӯзҳо сафи ҷавонони бонангу номус ва ватандӯст зиёд шуда, онҳо хизмати ҳарбиро дар сафи Қувваҳои Мусаллаҳи Ҷумҳурии Тоҷикистон бо ифтихор ва бо сари баланд адо менамоянд.

Сарбозони ноҳия иброз медоранд, ки дар хизмати аскарӣ дарк намудаанд, ки ҳар ҷавонмард барои иҷрои қарзи фарзандиаш бояд ба хизмати аскарӣ равад. «Зимни хизмат ҳар сарбоз мактаби ҷавонмардиро гузашта, ба ҳифзи Ватан-Модар ҳамаҷониба омода мешавад. Ба ғайр аз ин дар инҷо касбу ҳунар омӯхта, дурӣ аз падару модар ва ёру дӯстон имкон медиҳад, ки ба қадри онҳо бештар расӣ»,-мегӯянд онҳо.

Воқеан, хизмат дар сафи Қувваҳои Мусаллаҳ барои ҷавонмардон дарси ҷасорату мардонагӣ буда, дар ин мактаб онҳо ҳамчун шахсони далеру шуҷоъ тарбияву камол меёбанд. Дар ин самт, пеш аз ҳама, саҳми падару модарон зиёд буда, маҳз онҳо метавонанд дар дили фарзандон ҳисси баланди ватандӯстиро бештар созанд. Барои тарбияи дурусту муваффақи чунин фарзандони масъулиятшинос волидонро зарур аст, ки фарзандонро аз хурдӣ тарбияи хуб диҳанд.

Ҳадаф аз баргузории ин иқдом- баланд бардоштани ҳисси ватандӯстӣ ва ифтихори миллии ҷавонон, пешгирии ҳамроҳшавии онҳо ба ҳар гуна ҳизбу ҳаракатҳои иртиҷоӣ, инчунин ҷалби онҳо ба варзиш ва таҳкими тарзи ҳаёти солим мебошад.

Зарангези ЛАТИФ,
АМИТ «Ховар»

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон