РАВАНДИ ОБИ ДУШАНБЕ. Хабарнигор аз Африқо Омва Баблин: «Тоҷикистон дар раванди ҳалли мушкилоти обу иқлим саҳми арзанда гузоштааст»
ДУШАНБЕ, 13.06.2024 /АМИТ «Ховар»/. Тоҷикистон мамлакати зебо, Душанбе шаҳри комилан замонавӣ бо мардуми самимӣ аст. Иқлими ин ҷо хеле мусоид аст, обу ҳавои тоза ва одамони олиҷаноб, хушодоб, меҳмоннавозе, ки ҳамеша ба меҳмонон кумак мекунанд. Кӯдакон дар кӯча ба шумо салом мегӯянд, зеро шумо дар ин ҷо меҳмон ҳастед. Чунин баён намуд таассуроташро зимни суҳбат бо хабарнигори АМИТ «Ховар» хабарнигор аз давлати Габони Африқо Омва Баблин.
Омва Баблин афзуд, ки боду ҳаво ва табиати зебои Тоҷикистон ба ӯ хеле писанд омадааст. “Ин ҷо бо фазои мусоид ва табиати сабзаш макони бениҳоят дилпазир аст. Дар ин муддати кӯтоҳе, ки дар ин ҷо ҳастам, худро бегона эҳсос намекунам, баръакс худро хеле роҳату амн эҳсос мекунам, зеро мардуми тоҷик хеле меҳрубонанд. Ҷавонон кӯшиш мекунанд, ки ҳамеша ба ту кумак кунанд, ҳамин аст, ки фикр мекунам бо онҳо чанд сол боз дӯстӣ дорам”, -мегӯяд ӯ.
Тавре Омва Баблин иброз намуд, об ҳаёт аст ва бе об дар ин дунё зиндагӣ аз байн меравад. Мо ҳама дар ин ҷо барои ҳал намудани ин мушкилот ҷамъ омадаем, зеро ин масъаларо бояд дастҷамъона бартараф намоем.
“Ҳоло қариб давлате нест, ки аз оби нӯшокӣ мушкилӣ надошта бошад, ба мисли вазъияти мамлакатҳои арабӣ, мамлакатҳои Африқо ва мамлакатҳои қитъаи ҷанубӣ. Аз ин хотир ман хеле шодам, ки Тоҷикистон дар ин раванд саҳми арзанда гузоштааст ва мегузорад. Бо ибтикори Тоҷикистон Ассамблеяи генералӣ оид ба масъалаҳои об аз соли 2000 то 2016 7 қатънома қабул кард, аз ҷумла соли 2003 Соли байналмилалии оби тоза, давраи аз соли 2005 то 2015 Даҳсолаи байналмилалии амал «Об барои ҳаёт», 2013- Соли байналмилалии об эълон гардид. Ҳамкорӣ дар доираи Даҳсолаи байналмилалии амал «Об барои рушди устувор, солҳои 2018-2028» сазовори таваҷҷуҳи хосса мебошад. Дар ин муддат Тоҷикистон на як бор ба минбари баррасии масоили об дар сатҳи ҷаҳонӣ табдил ёфтааст”,- афзуд хабарнигор аз Габон.
Ёдовар мешавем, ки дар Душанбе Конференсияи сеюми байналмилалии сатҳи баланд оид ба татбиқи «Даҳсолаи байналмилалии амал «Об барои рушди устувор, солҳои 2018-2028» баргузор гардид ва дар инъикоси ин чорабинии муҳим беш аз 300 нафар намояндагони воситаҳои ахбори оммаи дохиливу хориҷӣ фаъолона иштирок намуданд.
Дар ифтитоҳи конференсия Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иштирок ва суханронӣ намуданд.
Ҳамзамон дар кори ин чорабинии сатҳи баланди байналмилалӣ зиёда аз ду ҳазор нафар аз ҳайатҳои расмии беш аз 100 давлати аъзои Созмони Милали Муттаҳид, роҳбарону коршиносон ва таҳлилгарони масоили обу иқлим аз 62 ташкилоту созмонҳои минтақавию байналмилалӣ иштирок карданд.
Зарангези ЛАТИФ,
АМИТ «Ховар»
АКС: АМИТ «Ховар»
Сафири Тоҷикистон дар Амороти Муттаҳидаи Араб дар брифинги оид ба раванди омодагӣ ба Конфронси оби СММ-2026 иштирок намуд
Тоҷикистон то имрӯз ба 11 конвенсияи байналмилалии муҳитизистӣ ҳамроҳ шудааст
МЕҲРГОН-ҶАШНИ БАРАКАТУ ФАРОВОНӢ ВА МЕҲРУБОНӢ. Иқтибосҳо аз суханрониҳои Президенти Тоҷикистон
Президенти Ҷумҳурии Тоҷикистон Эмомалӣ Раҳмон дар Ҳамоиши Роҳбарон оид ба гуногунии биологӣ иштирок намуданд
ҲИФЗИ ПИРЯХҲО. Коҳиши пиряхҳои ҳавзаи Зарафшон метавонад ба амнияти экологии Осиёи Марказӣ таъсир расонад
Исломиддин Раҳмон: «Яке аз вазифаҳои олии стандартизатсия ҳифзи ҳаёт ва саломатии инсон мебошад»
Сабзалӣ Ҷаъфарзода: «Таъсиси Маркази миллии тестӣ аз ҷумлаи ислоҳоти муҳимми соҳаи маориф дар даврони соҳибистиқлолии Тоҷикистон аст»
АЗ ДИПЛОМАТИЯИ ОБ ТО ДИПЛОМАТИЯИ ПИРЯХҲО. Андешаҳо оид ба ташаббусҳои Президенти Тоҷикистон дар даврони истиқлолият
Сафири Тоҷикистон дар Австрия дар Симпозиуми байналмилалии об иштирок намуд
Сироҷиддин Муҳриддин бо иҷрокунандаи вазифаи муовини Дабири кулли ЮНЕСКО оид ба илмҳои табиӣ мулоқот намуд
Сахидод Раҳматуллозода: «Ташкили дарсҳои маҷозӣ барои омӯхтани забони давлатӣ тавассути шабакаҳои иҷтимоӣ ба манфиати кор мебошад»
Раҳим Саидзода: «Омӯзгор бо таълиму тарбияи насли наврас дар ташаккули неруи зеҳнӣ ва маънавии ҷомеа саҳм мегузорад»
