Тоҷикистон ва Ҳиндустон дар самти омода намудани мутахассисони соҳаи сайёҳӣ ҳамкориро густариш медиҳанд

ДУШАНБЕ, 26.06.2024. /АМИТ «Ховар»/. 25 июн дар Кумитаи рушди сайёҳии назди Ҳукумати Ҷумҳурии Тоҷикистон мулоқоти раиси кумита Камолиддин Муминзод бо Сафири Фавқулода ва Мухтори Ҷумҳурии Ҳиндустон дар Ҷумҳурии Тоҷикистон Раҷеш Уки доир гардид, ки зимни он ҷонибҳо масъалаи омода намудани мутахассисон дар самти сайёҳӣ,  хизматрасонӣ тавассути Барномаҳои таълимии ITEC ва рушди парвозҳои мустақим миёни ду мамлакатро баррасӣ намуданд, хабар медиҳад АМИТ «Ховар» бо истнод ба Кумитаи рушди сайёҳӣ.

Гуфта шуд, ки дар натиҷаи сиёсати дарҳои кушод, ки аз ҷониби Президенти Ҷумҳурии Тоҷикистон муҳтарам Эмомалӣ Раҳмон эълон гардидааст, ҷумҳурии  мо бо  кишвари  Ҳиндустон муносибатҳои бисёрсамта, аз ҷумла самти сайёҳиро густариш медиҳад.

Ҷонибҳо бобати таҳкими  ҳамкории тарафайн дар самти сайёҳӣ мубодилаи афкор намуда, иброз доштанд, ки тайи  солҳои охир сайёҳони Ҳиндустон ба тамошои табиати нотакрори Тоҷикистон майлу рағбати бештар зоҳир намуда истодаанд.

Дар фарҷоми вохӯрӣ ҷонибҳо ҳавасмандии худро ҷиҳати рушди ҳамкорӣ дар самти сайёҳӣ иброз карда, соҳаи сайёҳиро ҳамчун самти афзалиятноки рушди иқтисоди миллӣ арзёбӣ намуданд.

АКС: Кумитаи рушди сайёҳии назди Ҳукумати Ҷумҳурии Тоҷикистон