ҶАШНИ ТИРГОН. Он ҳамчун воситаи маъмули сайёҳии миллӣ муаррифӣ гардид

ДУШАНБЕ, 01.07.2024. /АМИТ «Ховар»/. 30 июн дар «Боғи Ирам»-и шаҳри Душанбе ҷашни Тиргон бо баргузории иди зардолу ва намоиши «Хушкмеваҳои Тоҷикистон» бо шукуҳи хоса ҷашн гирифта шуд. Дар ин макон, дар баробари дигар вазорату идораҳо, мақомоти маҳаллӣ гӯшаи сайёҳии мамлакат ташкил шуда, ин ҷашни қадимаи тоҷикон ҳамчун бренди миллии сайёҳӣ муаррифӣ гардид. Дар ин хусус АМИТ «Ховар» бо истинод ба Кумитаи рушди сайёҳӣ хабар медиҳад.

Таҷлили идҳои хос ба кишоварзӣ, аз ҷумла намоишгоҳҳои маҳсулоти кишоварзӣ, ҷашнҳои «Сада», «Тиргон», «Меҳргон», идҳои «Зардолу», «Харбуза ва асал», эълон намудани Иди ангур ва Иди себ диққати сайёҳону меҳмонони хориҷиро ба мамлакати офтобрӯяи мо бештар ҷалб намуда, лаззати меваҳои шаҳдбори Тоҷикистон ҳамеша дар хотироти онҳо боқӣ мемонад ва ин ҳолат ба рушди сайёҳии аграрӣ мусоидат менамояд.

Меваҳои шаҳдбор ва аз лиҳози экологӣ тозаи Тоҷикистон, аз ҷумла ангур, шафтолу, зардолу, гелос, себ, нок ва ҷамъоварии онҳо бевосита дар боғҳо, сабзавоти тару тоза, маҳсулоти полезӣ, чун харбузаю тарбуз, меваи хушк, асали болаззаттарин, афшураи меваю сабзавот ва дигар маҳсулоти аз лиҳози экологӣ тоза заминаи рушди сайёҳии кишоварзӣ ё худ агротуризм ба шумор мераванд.

Ба иттилои манбаъ, ҳамзамон бо ташаббуси Кумитаи рушди сайёҳӣ дар ҳамкорӣ бо ширкатҳои сайёҳӣ таблиғу ташвиқи мавзеъҳои сайёҳии деҳот ва ташкили хатсайрҳо дар арафаи идҳои миллии мардумӣ ба роҳ монда шудааст.

АКС: Кумитаи рушди сайёҳии назди Ҳукумати Ҷумҳурии Тоҷикистон