Дар ноҳияи Шоҳмансури пойтахт таъмини 665 бино бо неруи гармӣ ба нақша гирифта шудааст

ДУШАНБЕ, 25.07.2024 /АМИТ «Ховар»/. Мақомоти иҷроияи ҳокимияти давлатии ноҳияи Шоҳмансури пойтахт, бо мақсади омодагии ҳамаҷониба ба фаслҳои тирамоҳу зимистони солҳои 2024-2025, таъмини 665 адад биноро бо неруи гармӣ ба нақша гирифтааст. Аз ин теъдод, айни замон 143 бино барои қабули нерӯи гармӣ омода шуда, дар биноҳои боқимонда корҳои таъмирӣ идома доранд. Дар ин хусус 24 июл зимни нишасти матбуотии Мақомоти иҷроияи ҳокимияти давлатии ноҳияи Шоҳмансур, иҷрокунандаи Раиси ноҳия иттилоъ дод.

Дар нишаст ҳамчунин иттилоъ дода шуд, ки дар шаш моҳи соли равон корҳои ободонӣ вусъат ёфта, ҷиҳати хуррамгардонии ноҳия зиёда аз 77 ҳазору 680 бех ниҳоли дарахтони ороишӣ ва сояафкан, 3729401 ҳазор адад гулҳои мавсимӣ, 37239 қаламча, 121192 бех гули садбарг, 1 миллиону 90 ҳазору 250 бех гули лола шинонида, масоҳати 26 ҳазору 230 метри мурабаъ майсазор гардонида шудааст.

Дар ноҳияи Шоҳмансури пойтахт, дар маҷмӯъ 1023 гектар майдони умумии кишти зироат мавҷуд буда, аз ин, 25 гектар заминҳои хоҷагиҳои ҷамъиятӣ, 494 гектар хоҷагиҳои деҳқонӣ ва 512 гектар заминҳои хоҷагиҳои аҳолӣ мебошад.

Дар заминҳои ҳудуди ноҳия 272 хоҷагиҳои деҳқонӣ фаъолият доранд, ки дар ихтиёри худ 494 гектар заминҳои обӣ доранд.

Тибқи нақша, 361 гектар замини кишт ба нақша гирифта шуда, дар асл дар майдони 382 гектар кишти тирамоҳиву баҳорӣ гузаронида шудааст, ки 21 гектар барзиёд ё 106 фоиз нақшаро ташкил медиҳад.

Акс: АМИТ «Ховар»