«Стратегияи рушди ҳифзи иҷтимоии аҳолии Ҷумҳурии Тоҷикистон барои давраи то соли 2040» қабул гардид

Октябрь 7, 2024 13:13

ДУШАНБЕ, 07.10.2024 /АМИТ «Ховар»/. «Стратегияи рушди ҳифзи иҷтимоии аҳолии Ҷумҳурии Тоҷикистон барои давраи то соли 2040» 30 сентябр зимни баргузории маҷлиси Ҳукумати Ҷумҳурии Тоҷикистон таҳти раёсати Президенти Ҷумҳурии Тоҷикистон, Пешвои миллат, Раиси Ҳукумати Ҷумҳурии Тоҷикистон муҳтарам Эмомалӣ Раҳмон қабул гардид.

«Стратегияи рушди ҳифзи иҷтимоии аҳолии Ҷумҳурии Тоҷикистон барои давраи то соли 2040» бо назардошти «Стратегияи миллии рушди Ҷумҳурии Тоҷикистон барои давраи то соли 2030», таҷрибаи аз амалисозии барномаҳои қаблӣ оид ба ҳифзи иҷтимоии аҳолӣ андӯхта, таҳлили умумии вазъи кунунии соҳаҳои ҳифзи иҷтимоии аҳолӣ дар Ҷумҳурии Тоҷикистон ва мутобиқ ба муносибати нави ҷомеаи ҷаҳон ба масъалаҳои амалишавии Ҳадафҳои Рушди Устувор таҳия гардида, вазифаҳо ва самтҳои асосии сиёсати давлатии Ҷумҳурии Тоҷикистонро дар низоми ҳифзи иҷтимоии аҳолӣ дар 15 соли оянда муайян менамояд.

Тавре сардори Раёсати ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Қудратулло Қурбонзода ба АМИТ «Ховар» иброз намуд, Стратегияи рушди ҳифзи иҷтимоии аҳолӣ дар баробари ҳуҷҷатҳои дигари стратегии мамлакат ва барномаҳои давлатӣ таҳти назорати Президенти Ҷумҳурии Тоҷикистон муҳтарам Эмомалӣ Раҳмон қарор дорад.

Президенти Тоҷикистон дар Паём ба Маҷлиси Олӣ «Дар бораи самтҳои асосии сиёсати дохилӣ ва хориҷии ҷумҳурӣ» 28 декабри соли 2023 изҳор доштанд, ки «аз ҷониби Ҳукумати мамлакат дар соли 2023 қабул гардидани Стратегияи рушди ҳифзи иҷтимоии аҳолӣ барои давраи то соли 2040 ва Барномаи маҷмуии давлатии тайёр намудани кадрҳои низоми ҳифзи иҷтимоии аҳолӣ барои давраи то соли 2030 ба ҳалли мушкилоту масъалаҳои ҷойдошта мусоидат менамояд».

Самтҳои асосӣ ва нишондиҳандаҳои стратегия вобаста ба се давраи зиндагӣ (ҳомиладорӣ, кӯдакию наврасӣ, синну соли қобили меҳнат ва давраи пиронсолӣ) тибқи арзёбии хавфҳо (сиёсӣ, иқтисодӣ, молиявӣ, иҷтимоӣ ва экологӣ) муайян мегарданд.

Иброз шуд, ки дар баробари дастовардҳои назаррас дар таъмин ва пешбарии ҳукуқи занон ва духтарон дар Тоҷикистон то ҳол дар ин самт баъзе норасоиҳо ба мушоҳида мерасанд, ки ҳалли онҳо барои беҳтар намудани вазъи иҷтимоии занон ва духтарон зарур мебошад. Ҳукумати Ҷумҳурии Тоҷикистон аз рӯзҳои аввали истиқлолият ба масъалаи баланд бардоштани мақоми зан дар ҷомеа, фарогирии духтарон ба таҳсил, пешгирии зӯроварӣ ва хушунат нисбат ба занон, таъмини имконияти баробар дар идоракунӣ, таъмини ҳуқуқҳои баробари иқтисодӣ ва ҷанбаъҳои дигари муҳими ҳаёти иҷтимоиву иқтисодӣ чораҳои назаррас ва барномаҳои мушаххасро амалӣ менамояд.

Таҳқиқоти солҳои охир нишон медиҳад, ки дар баъзе самтҳо, махсусан дар самти пешгирии осебпазирии иҷтимоиву иқтисодӣ ташвишҳои зиёд боқӣ мондаанд. Аз ҷумла, масъалаи зӯроварӣ ва хушунат нисбат ба занон ва духтарон то ҳол ҷой дорад. Аз ин рӯ вобаста ба ин масъалаҳо дар амалӣ гардидани стратегия якчанд тадбирҳо амалӣ мегарданд.

«Вазорату идораҳо ва мақомоти иҷроияи ҳокимияти давлатӣ барои амалисозии самараноки стратегия ва нақшаи амали он тадбирҳои дахлдор андешида, бо мақомоти дигари давлатӣ, иттиҳодияҳои ҷамъиятӣ ва шарикони рушд дар ин самт ҳамкорӣ менамоянд»,-гуфт Қудратулло Қурбонзода.

АКС аз манбаъҳои боз

 

Октябрь 7, 2024 13:13

Хабарҳои дигари ин бахш

«ДУШАНБЕ — МУАРРИФУ ТАҲКИМБАХШИ АРЗИШҲОИ СОҲИБИСТИҚЛОЛӢ». Бардошт аз ҳамоиши илмӣ-адабӣ
ИСТИҚЛОЛИЯТ — ҚИМАТТАРИН НЕЪМАТИ ЗИНДАГӢ. Дар мақомоти Ваколатдор оид ба ҳуқуқи инсон ҳамоиши идона баргузор шуд
Дар Чин барои хизматчиёни давлатӣ даври омӯзишӣ оғоз гардид
Лоиҳаи «Беҳтар намудани хизматрасонии тиббӣ барои модар ва кӯдак дар чор ноҳияи вилояти Хатлон» амалӣ шуд
Ғолибони озмунҳои ҷумҳуриявии «Ҳамсари беҳтарин» ва «Фарзанд-боғи падару модар» муайян гардиданд
Ягона роҳи пешгирии бемории сурхча ва гулафшон иммунизатсия мебошад
Дар беш аз 400 муассисаи тандурустии Тоҷикистон воситаҳо барои пардохти электронӣ насб гардиданд
Дар шаҳри Турсунзода биноҳои Маркази касбомӯзӣ ва раёсати Агентии меҳнат ва шуғли аҳолӣ бунёд мегарданд
Озмунҳои ҷумҳуриявии «Беҳтарин ҳамсар» ва «Фарзанд-боғи падару модар» ҷамъбаст мегарданд
Ҷаласаи V Шурои ҳамоҳангсози мақомоти ваколатдори давлатҳои аъзои СААД баргузор гардид
Дар Тоҷикистон ҳавои фасли тирамоҳ чӣ гуна мешавад?
Дар Коллеҷи технологии шаҳри Душанбе 5 синфхонаи иловагӣ ба истифода дода мешавад