«Ту қалби Тоҷикистонӣ, Душанбе!». Дар ноҳияи Шоҳмансур ғолибони даври ноҳиявии озмун ҳавасманд гардонида шуданд

ДУШАНБЕ, 24.11.2024. /АМИТ «Ховар»/. Бо ташаббуси Мақомоти иҷроияи ҳокимияти давлатии ноҳияи Шоҳмансури шаҳри Душанбе бахшида ба «Рӯзи Парчами давлатӣ» ва ҳавасмандгардонии ғолибони даври ноҳиявии озмуни шаҳрии «Ту қалби Тоҷикистонӣ, Душанбе!» чорабинии тантанавӣ баргузор гардид, иттилоъ медиҳад АМИТ «Ховар».

Муовини Раиси ноҳия Заррина Зуҳурзода иброз намуд, ки Парчами давлатӣ  Тоҷикистонро ҳамчун давлати соҳибистиқлол ва соҳибтамаддун дар арсаи ҷаҳон муаррифӣ карда, ифтихор ва асоси ҳастии миллати тоҷик ба шумор меравад.

Зимни маросим ғолибони даври ноҳиявии озмуни шаҳрии «Ту қалби Тоҷикистонӣ, Душанбе!», ки аз ташаббусҳои навбатии Раиси Маҷлиси милии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо мақсади баланд бардоштани завқи бадеӣ ва тақвияти неруи зеҳнӣ мебошад, аз ҷониби Мақомоти иҷроияи ҳокимияти давлатии ноҳияи Шоҳмансур бо диплому сипосномаҳо қадрдонӣ гардиданд.

Дар фарҷом бо таваҷҷуҳ ба муттаҳидӣ ва зери ливои Парчами давлатии Ҷумҳурии Тоҷикистон барномаи ҷолиби фарҳангӣ пешкаш карда шуд.

АКС: Мақомоти иҷроияи ҳокимияти давлатии ноҳияи Шоҳмансур