Дар Хатлон вобаста ба нишондиҳандаҳои Паёми Президенти Тоҷикистон ба Маҷлиси Олӣ ҳамоиши вилоятӣ баргузор гардид

ДУШАНБЕ, 04.01.2025 /АМИТ «Ховар»/. Бо ташаббуси Мақомоти иҷроияи ҳокимияти давлатии вилояти Хатлон дар Театри вилоятии мусиқӣ-мазҳакавии ба номи Ато Муҳаммадҷонов таҳти унвони «Паём ва нақши он дар таҳкими давлатдории миллӣ» ҳамоиши вилоятӣ доир гардид. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон хабар медиҳад.

Дар ҳамоиш иштирокдорон доир ба аҳамияти Паёми Президенти Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» ибрози назар карданд. Таъкид гардид, ки он на танҳо ҳуҷҷати роҳнамо барои рушди мамлакат мебошад, балки ҳамчун омили муҳими таҳкими давлатдории миллӣ ва истиқлоли давлатӣ хизмат мекунад.

Иброз гардид, ки дар Паёми Президенти Тоҷикистон ба Маҷлиси Олӣ рушди соҳаҳои иҷтимоӣ, иқтисодӣ, илму маориф ва фарҳанг ҳамчун самтҳои афзалиятнок муайян гардидааст. Татбиқи ҳадафҳои стратегӣ, аз ҷумла рушди иқтисоди рақамӣ, инноватсия, саноатикунонии босуръат, беҳтар кардани шароити зисти мардум ва баланд бардоштани сатҳи маърифатнокии ҷавонон аз вазифаҳои муҳим мебошанд.

Иштирокдорони ҳамоиш зарурати иҷрои амалии нуктаҳои мубрами Паёмро барои рушди минбаъдаи мамлакат муҳим арзёбӣ намуда, изҳор доштанд, ки Паёми Президенти Тоҷикистон ба Маҷлиси Олии Ҷумҳурии Тоҷикистон на танҳо роҳнамо барои сиёсатмадорон ва роҳбарони соҳаҳо аст, балки ҳуҷҷате мебошад, ки ҳар шаҳрванди мамлакатро ба амалҳои созанда ва ҳадафҳои нек ҳидоят менамояд.

АКС: Мақомоти иҷроияи ҳокимияти давлатии вилояти Хатлон