Дар хатсайри Душанбе-Кӯлоб парвози аввалини ҳавопаймо анҷом дода шуд

ДУШАНБЕ, 16.01.2025. /АМИТ «Ховар»/. 15 январ дар хатсайри Душанбе–Кӯлоб парвози ҳавопаймоҳо оғоз гардид. Дар ин хусус ба АМИТ «Ховар» дар  хадамоти матбуоти Раиси вилояти Хатлон иттилоъ доданд.

Ҳавопаймо аз Душанбе бо 17 мусофир соати 10:20 парвоз карда, соати 10:50 дар  шаҳри Кӯлоб фуруд омад. Аз шаҳри Кӯлоб ҳавопаймо соати 13:30 парвоз карда, соати 14:00 дар шаҳри Душанбе фуруд омад.

Парвоз байни Душанбе ва Кӯлоб ҳафтае се маротиба- рӯзҳои сешанбе, панҷшанбе ва якшанбе анҷом дода мешавад.

Ёдовар мешавем, ки Ширкати ҳавопаймоии «Тоҷик-Эйр» имсол дар хатсайрҳои Душанбе–Кӯлоб ва Душанбе–Панҷакент парвозҳоро фаъол намудааст.

АКС: Хадамоти матбуоти Раиси вилояти Хатлон