Ҷашни Сада дар шаҳри Ҳисор бо намоиши дастовардҳои кишоварзон пуршукуҳ таҷлил гардид

ДУШАНБЕ, 01.02.2025 /АМИТ «Ховар»/. Сада бо таърихи қадимии худ бузургтарин ҷашни миллии тоҷикон ва аҷдодамон маҳсуб шуда, ниёгони мо онро аз замонҳои хеле қадим таҷлил менамуданд ва бо шарофати соҳибистиқлолӣ ва сиёсати Ҳукумати Тоҷикистон, хосса Президенти Ҷумҳурии Тоҷикистон муҳтарам Эмомалӣ Раҳмон анъанаву суннатҳо ва ҷашнҳои миллии мардуми куҳанбунёди мо аз нав эҳё гардиданд. Чунин иброз намуд иҷрокунандаи вазифаи Раиси шаҳри Ҳисор Ҷаббор Носирзода дар маросими таҷлили ҷашни Сада дар шаҳри Ҳисор.

АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор иттилоъ медиҳад, ки дар базмгоҳи ҷашни Сада бо иштироки меҳмонону сокинони шаҳр, бахусус кишоварзон чорабинии пуршукуҳи фарҳангӣ гузаронида шуда, дар доираи барномаҳои ҷашнӣ дар кӯчаи ба номи Тоҷиддин Муҳиддинов бо ташаббуси кормандони Раёсати кишоварзӣ, муассисаю корхонаҳои соҳаи иқтисодию иҷтимоии шаҳр намоиши намунаҳои техникаҳои кишоварзӣ, ҳунарҳои мардумӣ, маснуоти оҳангарӣ, таомҳои миллӣ, маҳсулоти ғалладонагию сабзавот ва меваҷот ташкил карда шуд.

Дар таҷлили ҷашни Сада, ки бо афрӯхтани гулхан оғоз ёфт, доир ба таърихи пайдоиш, моҳият, ҳадафҳо ва нақши бузурги ин ҷашн дар рӯзгори ҳазорсолаи тоҷикон сухан гуфта шуд. Арҷгузорӣ ба ҷашни Сада сол аз сол бештар шуда, он ба муҳимтарин ҷашни миллӣ табдил ёфтааст, ки ифодагари марому ормонҳои беҳтарини мардум мебошад.

Таҷлили ҷашнҳои бошукуҳи умумимиллӣ, аз қабили Сада, Наврӯз, Меҳргон, Тиргон ифодагари иттиҳоду сарҷамъӣ ва ҷонибдории мардуми диёр аз сиёсати фарҳангпарваронаи Ҳукумати Ҷумҳурии Тоҷикистон бо сарварии Президенти Ҷумҳурии Тоҷикистон муҳтарам Эмомалӣ Раҳмон маҳсуб шуда, ҳамзамон рамзи меҳру муҳаббат, дӯстию рафоқат, арҷгузорӣ ва иззату эҳтиром ба эҳёи ҷашну маросими миллии бостонӣ мебошанд.

АКС: Мақомоти иҷроияи ҳокимияти давлатии шаҳри Ҳисор