«БА ДАВЛАТУ МИЛЛАТАМ СОДИҚОНА ХИЗМАТ МЕКУНАМ». Бо ҷалби 13 ҳазор афсару сарбоз маросими ҷоизасупории ин фестивал доир гардид

ДУШАНБЕ, 27.02.2025. /АМИТ «Ховар»/. 26 феврал дар шаҳри Душанбе бо ҷалби 13 ҳазор афсару сарбоз ва ҷавонони синни даъватӣ таҳти унвони «Ба миллату давлатам содиқона хизмат мекунам!» маросими ҷоизасупории Фестивали 5-уми дӯстии афсарону сарбозон ва ҷавонони синни даъватӣ доир гардид. Дар ин хусус ба АМИТ «Ховар» аз шуъбаи иттилоотии дастгоҳи Раиси шаҳри Душанбе хабар доданд.

Дар доираи Фестивали дӯстии афсарону сарбозон ва ҷавонони синни даъватӣ байни афсарону сарбозон ва ҷавонони синни даъватӣ аз рӯйи намудҳои футболи хурд, волейбол, шоҳмот, гӯштини миллӣ ва варзиши сабук мусобиқа гузаронида шуд. Ғолибон дар маросими ҷоизасупорӣ қадрдонӣ карда шуданд.

Фестивали 5-уми дӯстии афсарону сарбозон ва ҷавонони синни даъватӣ таҳти унвони «Ба миллату давлатам содиқона хизмат мекунам!» бо мақсади иҷрои қарори Раиси шаҳри Душанбе муҳтарам Рустами Эмомалӣ бахшида ба 32-солагии таъсиси Қувваҳои Мусаллаҳи Ҷумҳурии Тоҷикистон баргузор шуд.

Мақсади фестивал аз самараноку мақсаднок истифода намудани инфрасохтори соҳаи варзиш, ҷалби афсарону сарбозон ва ҷавонони синни даъватию тодаъватӣ ба варзиш ва таҳкими тарзи ҳаёти солим, пешгирии бемориҳои сироятӣ, баланд бардоштани руҳияи афсарону сарбозон дар роҳи хизмати содиқона ба Ватан, ҷалби ҷавонони синни даъватию тодаъватӣ ба ватандӯстию хештаншиносӣ, шиносоӣ бо шароити хизмати афсарону сарбозон, ҷалби ихтиёрии онҳо ба хизмати ҳарбӣ, хосса пешгирии наврасону ҷавонон аз амалҳои номатлуби иҷтимоӣ ва ҳушёрию зиракии сиёсии онҳо иборат буд.

АКС: Шуъбаи иттилоотии дастгоҳи Раиси шаҳри Душанбе