Дар Душанбе рушди тиҷорат дар шароити иқтисоди «сабз» баррасӣ гардид

ДУШАНБЕ, 27.02.2025 /АМИТ «Ховар»/. Рушди соҳаи тиҷорат, ки дар шароити ташаккули иқтисоди «сабз» аҳамияти махсуси иҷтимоӣ дорад, ҳамчун яке аз самтҳои муҳим бояд мавриди таваҷҷуҳи хос қарор гирад. Ин нуктаро Директори Институти илмию таҳқиқотии рушди устувор ва иқтисоди сабзи Донишгоҳи байналмилалии сайёҳӣ ва соҳибкории Тоҷикистон Фарҳод Шарофзода дар ҳамоише, ки дар мавзуи «Татбиқи технологияҳои «сабз» дар савдои чакана: масъулияти иҷтимоӣ ва рушди устувор» дар Душанбе баргузор гардид, иброз дошт. Дар ин хусус АМИТ «Ховар» бо истинод ба Донишгоҳи байналмилалии сайёҳӣ ва соҳибкории Тоҷикистон иттилоъ медиҳад.

Донишгоҳи байналмилалии сайёҳӣ ва соҳибкории Тоҷикистон ва Маркази Орхуси Кумитаи ҳифзи муҳити зисти назди Ҳукумати Ҷумҳурии Тоҷикистон созмондиҳандагони ҳамоиш буданд.

Фарҳод Шарофзода оид ба ташаббусҳои ҷаҳонии Президенти Ҷумҳурии Тоҷикистон муҳтарам Эмомалӣ Раҳмон дар самти рушди устувор, иқтисоди «сабз», ҳифзи муҳити зист ва тағйирёбии иқлим ёдовар шуда, муҳим будани мавзуи ҳамоишро дар шароити ташаккули иқтисоди «сабз» дар ҷаҳони муосир таъкид намуд.

Инчунин намояндагони Кумитаи ҳифзи муҳити зисти назди Ҳукумати Ҷумҳурии Тоҷикистон, Вазорати рушди иқтисод ва савдои Ҷумҳурии Тоҷикистон, роҳбарону мутахассисони шабакаҳои савдо, доираҳои тиҷоратӣ, созмонҳои ҷамъиятӣ ва олимону коршиносони соҳа доир ба татбиқи технологияҳои «сабз» дар савдои чакана, инчунин масъулияти иҷтимоӣ ва рушди устувор сухан намуданд.

АКС: Донишгоҳи байналмилалии сайёҳӣ ва соҳибкории Тоҷикистон