ИНТИХОБОТИ ВАКИЛОНИ ХАЛҚ-2025. Дар шаҳри Хуҷанд оид ба омодагӣ ба интихобот машварат доир гардид

ДУШАНБЕ, 28.02.2025 /АМИТ «Ховар/». Мутобиқи талаботи Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» бояд як рӯз пеш аз интихобот тамоми воситаҳои таблиғотӣ аз пештоқи муассисаву корхонаҳо гирифта шаванд. Дар ин хусус зимни баргузории машварат бо иштироки мушоҳидони миллии Ҳизби Халқии Демократии Тоҷикистон дар шаҳри Хуҷанд вобаста ба омодагӣ ба интихобот баён гардид.

Ҳамчунин дар машварат ба мушоҳидон ҳуқуқҳои муайяннамудаи Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» фаҳмонида шуданд.

Раиси Кумитаи иҷроияи Ҳизби Халқии Демократии Тоҷикистон дар шаҳри Хуҷанд Мунзифа Ҷабборӣ иброз намуд, ки интихобот яке аз маъракаҳои муҳими сиёсӣ мебошад. Дар он ҳар шаҳрванди мамлакат имконияти озодона ва баробари иштирок дорад.

Иштироки фаъолона дар интихобот нишондиҳандаи масъулияти  шаҳрвандон нисбат ба ояндаи давлат ва ҷомеа мебошад.

Бо мақсади дар сатҳи баланд доир гардидани интихоботи даъвати нави вакилон ба Маҷлиси намояндагони Маҷлиси Олии Ҷумҳурии Тоҷикистон ва вакилони маҳаллии ҳокимияти давлатӣ хабарномаҳо тақсим ва рӯйхати дақиқи интихобкунандагон тартиб дода шудааст.

Дар ҳамаи участкаҳои интихоботии ҳудуди шаҳру навоҳии вилояти Суғд, ки ин маъракаи муҳим баргузор хоҳад шуд, омодагӣ дар сатҳи зарурӣ қарор дорад.

АКС: Кумитаи иҷроияи Ҳизби Халқии Демократии Тоҷикистон дар шаҳри Хуҷанд