НИШАСТИ МАТБУОТӢ. Донишкадаи тарбияи ҷисмонии Тоҷикистон бо 35 донишгоҳи хориҷи дуру наздик ҳамкорӣ менамояд

ДУШАНБЕ, 06.02.2025. /АМИТ «Ховар»/. Донишкадаи тарбияи ҷисмонии Тоҷикистон ба номи Саймуъмин Раҳимов ҳоло бо 35 донишгоҳи хориҷи дуру наздик ҳамкорӣ дорад. Дар ин хусус имрӯз зимни нишасти матбуотӣ ректори донишкада Амир Иброҳимзода ба хабарнигорон иттилоъ дод.

Ҳамзамон роҳбарияти донишкада тасмим гирифтааст, ки бо Маркази барномаҳои байналмилалии Вазорати маориф ва илми Ҷумҳурии Тоҷикистон, шуъбаи робитаҳои ҷамъиятии Сафоратхонаи Амрико дар Тоҷикистон, Сафоратхона ва ройзании фарҳангии Ҷумҳурии Исломии Эрон, ташкилоти  байналмилалии сершумор, аз ҷумла ТИКА, ACCELS, IREX, DAAD, GIZ, ACTED ва ғайра робитаи ҳамкорӣ барқарор намояд.

«Барои ҷалби донишҷӯён аз давлатҳои хориҷӣ ба донишкада мунтазам тадбирҳо андешида мешаванд. Ин аст, ки дар айни замон дар донишкада 46 донишҷӯ аз Узбекистон, Туркманистон, Ҷумҳурии Исломии Афғонистон, Ҷумҳурии Исломии Покистон ва Федератсияи Русия таҳсил менамоянд», -гуфт ректори донишкада.

Зарангези ЛАТИФ,
АМИТ «Ховар»

АКС: АМИТ «Ховар»