Раиси Комиссияи марказии интихобот ва раъйпурсии Тоҷикистон бо роҳбарони созмонҳои байналмилалӣ вохӯрӣ намуд

ДУШАНБЕ, 28.02.2025. /АМИТ «Ховар»/. Имрӯз Раиси Комиссияи марказии интихобот ва раъйпурсии Ҷумҳурии Тоҷикистон Бахтиёр Худоёрзода бо Роҳбари ҳайати Созмони ҳамкории Шанхай Пяо Ян Фан, Раиси Шурои Олии интихоботии Туркия Енер Аҳмет ва Раиси Комиссияи марказии интихоботи Беларус Игор Карпенко, ки ба сифати мушоҳиди байналмилалӣ дар интихоботи Маҷлиси намояндагони Маҷлиси Олии Ҷумҳурии Тоҷикистон бо мақсади мушоҳидаи раванди интихобот ва гузаронидани он дар шароити шаффоф ва ошкоро ба Тоҷикистон омадаанд, мулоқот намуд. Дар ин хусус ба АМИТ «Ховар» аз Комиссияи марказии интихобот ва раъйпурсӣ хабар доданд.

Дар ҷараёни мулоқот тарафҳо бо изҳори қаноатмандӣ аз сатҳи баланди ҳамкорӣ дар байни ин давлатҳо иброз намуданд, ки сафари ҳайати мушоҳидони байналмилалӣ ба Тоҷикистон дар таҳкими робитаҳои манфиатбахши мақомоти интихоботии кишварҳо марҳалаи навро оғоз бахшида, барои афзудани муносибатҳои ҳасана ва дӯстию ҳамдигарфаҳмӣ роҳро ҳамвор хоҳад кард.

Ҳамчунин аз ҷониби роҳбарони ҳайатҳо таъкид гардид, ки иштироки теъдоди зиёди мушоҳидони байналмилалӣ дар интихоботи Маҷлиси намояндагони Маҷлиси Олии Ҷумҳурии Тоҷикистон далели нуфузи эътибори Тоҷикистон дар арсаи байналмилалӣ ва таваҷҷуҳи ҷомеаи ҷаҳонӣ ба низоми интихоботи мамлакат буда, барои табодули таҷриба заминаи муносиб фароҳам меорад.

Тарафҳо изҳор доштанд, ки густариш ва таҳкими ҳамкории мутақобили судманд дар масири интихобот барои ҳамаи ҷонибҳо аҳаммияти хос дошта, барои пешбурди робитаҳои тарафайн имконияти нав муҳайё менамояд.

 АКС: АМИТ «Ховар»