«САД РАНГИ ЧАКАН». Дар Исфара даври шаҳрии фестивали ҷумҳуриявӣ баргузор шуд

ДУШАНБЕ, 09.02.2025 /АМИТ «Ховар»/. Дар шаҳри Исфара даври шаҳрии Фестивали ҷумҳуриявии «Сад ранги чакан» баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Исфара хабар доданд.

Дар фестивал занону духтарон ва ҳунармандони шаҳр либосҳои қадимии чакан, либосҳои кӯдакона, рӯзмарра, маросимӣ, идона, расмӣ ва намоиши навъҳои гуногуни сӯзанидӯзиро ба намоиш гузоштанд.

Иброз гардид, ки Фестивали ҷумҳуриявии «Сад ранги чакан» ҳамасола бо мақсади баланд бардоштани эҳсоси ватандӯстию хештаншиносӣ, ифтихори миллӣ, қадру манзалати либоси миллӣ, ба таври васеъ намоиш додани дӯхти либосҳои миллӣ ва дар арсаи байналмилалӣ муаррифӣ кардани санъату ҳунари волои халқи тоҷик гузаронида мешавад.

Бо иқдоми наҷиби дурбинонаю ояндасози Пешвои миллат муҳтарам Эмомалӣ Раҳмон барои баланд бардоштани мақому манзалати нақшу нигор, сӯзанидӯзию гулдӯзии матоъҳои миллӣ, намоиш додани ҳунари волои тарроҳону ҳунармандон дар ҷаласаи 13-уми Кумитаи байниҳукуматӣ оид ба ҳифзи мероси фарҳанги ғайримоддии ЮНЕСКО дар шаҳри Порт-Луиси Ҷумҳурии Маврикий номинаи «Чакан, ҳунари гулдӯзӣ» дар Ҷумҳурии Тоҷикистон аз ҷониби ин Созмон расман ба рӯйхати Мероси фарҳанги ғайримоддии башарият ворид гардид, ки ин ифтихори мардуми сарбаланду фарҳангсолори тоҷик мебошад.

Санъати гулдӯзӣ дар асарҳои бостоншиносон, файласуфон, адибон, санъатшиносон ва кулли соҳаҳои илм инъикос ёфтааст. Бозёфтҳои бостоншиносони минтақаҳои ориёинишин гувоҳӣ медиҳанд, ки мардуми тоҷик ва аҷдодонашон дар матоъҳои гуногун гулпартоӣ ва гулдӯзӣ менамуданд, ки он байни дигар халқияти қадим маъруфу машҳур буд.

Ёдовар мешавем, ки давоми солҳои охир ин фестивал дар тамоми қаламрави мамлакат доир гардида, ба дарёфт ва муаррифии ҳунармандон, чеварон ва тарроҳони соҳибкасб мусоидат менамояд.

АКС: Мақомоти иҷроияи ҳокимияти давлатии шаҳри Исфара