35-СОЛАГИИ ИСТИҚЛОЛИ ДАВЛАТӢ. Дар Хатлон дар назди муассисаи таълимӣ бинои иловагӣ ба истифода дода шуд

 ДУШАНБЕ, 31.03.2025. /АМИТ «Ховар»/. Дар доираи таҷлили 35-солагии Истиқлоли давлатӣ дар шаҳру ноҳияҳои вилояти Хатлон муассисаҳои таҳсилоти миёнаи умумӣ сохта, ба истифода дода мешаванд. Дар ин хусус ба АМИТ «Ховар» аз хадамоти матбуоти Раиси вилояти Хатлон иттилоъ доданд.

Дар деҳаи Баҳористони Ҷамоати деҳоти Хуррамдиёри ноҳияи Абдураҳмони Ҷомӣ дар назди муассисаи таҳсилоти миёнаи умумии №-32 синфхонаи иловагӣ мавриди истифода қарор дода шуд.

Дар ин муассисаи таълимӣ шумораи умумии хонандагон 650 нафарро ташкил дода, бинои иловагӣ аз тарафи Бунёди миллии CASA-1000 бо маблағи умумии 2 миллиону 850 ҳазор сомонӣ сохта шуд.  Бино дуошёна буда, дорои 8 синфхона барои 350 хонанда дар ду баст мебошад.

Инчунин дар деҳаи Навбаҳори Ҷамоати деҳоти Дӯстии ноҳияи Абдураҳмони Ҷомӣ дар назди Муассисаи таҳсилоти миёнаи умумии №15 синфхонаи иловагӣ ба истифода дода шуд.

Бинои иловагӣ аз тарафи падару модарон ва шахсони саховатпеша бо маблағи умумии 1 миллион сомонӣ бунёд гардидааст.  Бинои иловагӣ дуошёна буда, дорои 8 синфхона барои 400 нафар хонанда дар ду баст мебошад.

АКС: Хадамоти матбуоти Раиси вилояти Хатлон