Дар Хадамоти назорати давлатии тандурустӣ Рӯзи Модар бошукуҳ таҷлил гардид

ДУШАНБЕ, 07.03.2025. /АМИТ «Ховар»/. Сарчашма ва сароғози ҳар кори бузург Зан –Модар мебошад. Меҳру муҳаббати занони тоҷик аз қаъри асрҳо сарчашма гирифта, бо тору пуди ҷашни бузурги миллиамон –Наврӯз омезиш ёфта, ба гулҳои ҳамешабаҳори Тоҷикистон мубаддал ёфтаанд. Зеро зан ва гул ҷаҳонро зебоӣ мебахшанд. Ин матлаб зимни ҳамоиши идона дар Хадамоти назорати давлатии тандурустӣ ва ҳифзи иҷтимоии аҳолӣ бахшида ба Рӯзи Модар баён гардид. Дар ин хусус ба АМИТ «Ховар» аз ин ниҳод иттилоъ доданд.

Сардори Хадамоти назорати давлатии тандурустӣ ва ҳифзи иҷтимоии аҳолӣ Султон Бекмуродзода иброз намуд, ки  «боиси ифтихор ва шарафмандӣ аст, ки дар ҳамаи самтҳои хоҷагии халқи мамлакат, аз ҷумла дар ин хадамот занон саҳми босазо доранд. Занон дар баробари мардон барои рушду инкишофи мамлакат саъю кӯшиши фаъолона менамоянд».

Дар ҳақиқат бунёди ҷомеаи демократӣ, ҳуқуқбунёд ва дунявӣ маҳз бо шарофати ҳамовозию дастгирии фаъолонаи занони Тоҷикистон мавқеи устувору пойдор пайдо намуд. Президенти Ҷумҳурии Тоҷикистон муҳтарам Эмомалӣ Раҳмон ба тамоми занони ҷумҳурӣ, алалхусус ба занони фаъолу фидокор таваҷҷуҳи хосса зоҳир намуда, дар яке аз вохӯриҳо чунин иброз намуданд: «Давлате, ки нисбат ба Модар — ин сарчашмаи ҳаёт ва бақои насли инсонӣ бепарво бошад, ояндаи худро аз даст медиҳад». 

АКС: Хадамоти назорати давлатии тандурустӣ ва ҳифзи иҷтимоии аҳолӣ