Модар сарчашмаи меҳру муҳаббат ва неруи бузурги маънавии ҷомеа мебошад

ДУШАНБЕ, 08.03.2026 /АМИТ «Ховар»/. Дар Академияи идоракунии давлатии назди Президенти Ҷумҳурии Тоҷикистон бахшида ба Рӯзи Модар таҳти унвони «Биҳишти ҷовидон хоҳӣ, бирав хидмат ба модар кун» ҳамоиши илмӣ-адабӣ баргузор гардид, хабар доданд ба АМИТ «Ховар» аз ин ниҳод.

Дар ҳамоиш нақши модар дар тарбияи фарзанд, таҳкими арзишҳои инсонӣ, ҳифзи суннатҳои миллӣ ва рушди ҷомеа муҳим арзёбӣ гардида, иброз шуд, ки эҳтиром ва қадршиносии модар аз муҳимтарин арзишҳои маънавии миллати тоҷик ба ҳисоб меравад.

Модар сарчашмаи меҳру муҳаббат, рамзи покӣ, сабру таҳаммул ва неруи бузурги маънавии ҷомеа мебошад.

Дар ҳамоиш дар мавзуъҳои «Фидокории зан – модар дар таҳким ва рушди фарҳанги миллӣ» ва «Модар – сафобахши зиндагӣ» маърузаҳо пешниҳод шуданд. Иброз гардид, ки гиромидошти модар ва эҳтиром ба зан-модар яке аз арзишҳои муҳими фарҳанги миллии тоҷикон ба ҳисоб рафта, чунин чорабиниҳо дар баланд бардоштани фарҳанги маънавӣ ва тарбияи насли ҷавон нақши муҳим доранд.

АКС: Академияи идоракунии давлатии назди Президенти Ҷумҳурии Тоҷикистон