Дар соҳаи нақлиёти Тоҷикистон 1639 зан фаъолият дорад, ки 65 нафараш роҳбар аст

ДУШАНБЕ, 07.03.2025 /АМИТ «Ховар»/. Ҳоло дар Вазорати нақлиёт ва муассисаҳои зерсохтори он 1639 нафар, аз ҷумла дар вазифаҳои роҳбарикунанда 65 нафар занон фаъолият менамоянд, ки натиҷаҳои корашон аз мардон кам нест. Ин нуктаро Вазири нақлиёти Тоҷикистон Азим Иброҳим дар ҷамъомади тантанавие, ки бахшида ба Рӯзи Модар дар Вазорати нақлиёт баргузор гардид, иброз намуд. Дар ин хусус АМИТ «Ховар» бо истинод ба Вазорати нақлиёти Тоҷикистон иттилоъ медиҳад.

Вазир афзуд, ки имрӯз занон на танҳо паси чанбараки автомобил менишинанд, балки дар самтҳои дигар ва мушкилтари соҳаи роҳу нақлиёт низ қобилият нишон медиҳанд.

Гуфта шуд, ки дар фарҳангу тамаддуни мо, тоҷикон иззату эҳтироми Зан-Модар ҳамеша ҷойгоҳи хос дорад. Мақому манзалати занон ва нақши онҳо дар эъмору идоракунии давлат ва муносибатҳои ҷамъиятӣ маҳз дар замони соҳибистиқлолӣ бо талошҳои Президенти Ҷумҳурии Тоҷикистон муҳтарам Эмомалӣ Раҳмон ва тадбирҳои андешидаи Ҳукумати мамлакат боло рафт. Фармони таърихии Сарвари давлат аз 3 декабри соли 1999 «Дар бораи тадбирҳои баланд бардоштани мақоми зан дар ҷомеа» далели ин гуфтаҳо мебошад.

Президенти Тоҷикистон дар Паём ба Маҷлиси Олӣ аз кулли иштирокчиён даъват намуданд, ки модарону хоҳарони худро хабар гиранд, аз ҳолу аҳволашон пурсанд ва ба онҳо кумак расонанд. Ин нишони эҳтирому самимияти беандозаи Пешвои миллат нисбат ба занону модарон мебошад.

Вазири нақлиёти Тоҷикистон хотирнишон сохт, ки «мо минбаъд низ барои ҷалби ҳарчи бештари занон ба кор ва фароҳам овардани шароити хуби корӣ аз тамоми имконот истифода менамоем».

Дар анҷом ба занони фаъоли соҳаи нақлиёт Сипоснома ва мукофотҳои пулӣ тақдим гардиданд.

АКС: Вазорати нақлиёти Ҷумҳурии Тоҷикистон