Донишгоҳи давлатии омӯзгории Тоҷикистон байни 422 муассисаи таҳсилоти олии ҷаҳон ҷойи 8-умро сазовор гардид

ДУШАНБЕ, 26.03.2025. /АМИТ «Ховар»/. Донишгоҳи давлатии омӯзгории Тоҷикистон ба номи Садриддин Айнӣ бо гирифтани зиёда аз ҳашт ҳазор хол дар “Раддабандии муассисаҳои олии таълимӣ” -и ҷаҳон дар соли 2025 байни 422 муассисаи таҳсилоти олӣ ҷойи 8-умро сазовор гардида, дар раддабандӣ аз Ҷумҳурии Тоҷикистон мавқеи аввалро соҳиб шуд. Дар ин хусус ба АМИТ “Ховар” аз Донишгоҳи давлатии омӯзгории Тоҷикистон хабар доданд.

Раддабандиро Муассисаи “Раддабандии муассисаҳои таҳсилоти олӣ” (HE Higher Education Ranking)-и Шурои сифат ва арзёбии таҳсилоти олӣ “HEQAC”, ки қароргоҳаш дар Ҷумҳурии Туркия мебошад, пас аз санҷишу таҳлилҳои самтҳои гуногуни фаъолияти 422 муассисаи олии таълимии 55 давлати ҷаҳон тартиб додааст.

Бояд гуфт, ки дар таърихи соҳибистиқлолӣ дар байни муассисаҳои таҳсилоти олии Ҷумҳурии Тоҷикистон бори нахуст яке аз донишгоҳҳои мамлакат соҳиби холи баланд дар ин раддабандӣ гардида, ба даҳгонаи беҳтаринҳои муассисаҳои олии таълимии ҷаҳон ворид шуд.

Баҳодиҳии раддабандӣ аз рӯи 25 самти фаъолияти донишгоҳ, аз ҷумла сифати таълим, ҳамкории байналмилалӣ, иқтидори илмӣ, идоракунӣ, устуворӣ, масъулияти иҷтимоӣ, навоварӣ, аккредитатсияи байналмилалӣ, табодули академии донишҷӯёну устодон, иҷрои нақшаи қабули довталабон, фаъолият дар шабакаҳои иҷтимоӣ, фазои мусоид барои анҷоми корҳои илмӣ, омӯзишу таълими забонҳои хориҷӣ, дастрасӣ ба таҳсили ройгон: квотаи президентӣ, маъюбон ва духтарон санҷида шуда, ҳар як меъёр бо холҳои муайян баҳо дода шудааст.

Ёдовар мешавем, ки дар ин раддабандӣ муассисаҳои таҳсилоти олии Британияи Кабир, Италия, Швейтсария, Австрия, Венгрия, Чехия, Олмон, Сербия, Туркия, Канада, Арабистони Саудӣ, Кореяи Ҷанубӣ, Тайланд, Аморати Муттаҳидаи Араб, Ҳиндустон, Озарбойҷон, Покистон, Бразилия, Миср, Баҳрайн, Африқои Ҷанубӣ, кишварҳои Осиёи Марказӣ ва дигар давлатҳо ворид шудаанд.