Давлати Кувайт Шартномаи таърихии сеҷониба ва Эъломияи Хуҷандро намунаи ибрат номид

ДУШАНБЕ, 04.04.2025 /АМИТ «Ховар»/. Вазорати корҳои хориҷии Давлати Кувайт имзои Эъломияи Хуҷандро аз ҷониби Ҷумҳурии Тоҷикистон, Ҷумҳурии Қирғизистон ва Ҷумҳурии Узбекистон намунаи ибрат номид. Дар ин хусус АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Аз ҷумла, дар изҳорот омадааст: «Вазорати корҳои хориҷӣ истиқболи Давлати Кувайтро аз имзои Эъломияи Хуҷанд аз ҷониби Ҷумҳурии Тоҷикистон, Ҷумҳурии Қирғизистон ва Ҷумҳурии Узбекистон изҳор менамояд. Ин эъломия ба таҳкими роҳҳои дӯстии абадӣ ва муайян намудани нуқтаи иттиҳоди сарҳадҳои байналмилалии се кишвар равона шудааст. Маросими имзои он рӯзи душанбе, 31 марти соли 2025 дар шаҳри Хуҷанди Ҷумҳурии Тоҷикистон баргузор гардид.

Давлати Кувайт ин қадами мусбатро, ки руҳияи ҳамкорӣ ва ҳамсоягии некро инъикос менамояд, қадрдонӣ карда, дар ин замина таъкид мекунад, ки ин дастовард намунаи ибрат барои пойбандӣ ба роҳи муколама ва ҳалли масъалаҳои баҳсӣ бо роҳҳои дипломатӣ мебошад.

Ба ин муносибат Вазорати корҳои хориҷӣ самимона ҳукуматҳо ва мардумони ҷумҳуриҳои дӯсти Тоҷикистон, Қирғизистон ва Узбекистонро  табрик гуфта, ба онҳо пешрафт ва шукуфоии доимӣ  таманно менамояд».

АКС: Хадамоти матбуоти Президенти Ҷумҳурии Тоҷикистон