Вобаста ба тибби сайёҳӣ ва нақши он дар рушди илмҳои табиатшиносӣ ва дақиқ конфронси байналмилалӣ доир шуд

ДУШАНБЕ,  22.04.2025 /АМИТ «Ховар»/. «Тибби сайёҳӣ ва нақши он дар рушди илмҳои табиатшиносӣ ва дақиқ»- таҳти чунин унвон бо ибтикори Институти сайёҳии Донишгоҳи байналмилалии сайёҳӣ ва соҳибкории Тоҷикистон конфронси илмию амалии байналмилалӣ баргузор гардид. Дар он олимону коршиносони соҳа аз Тоҷикистон, Қазоқистон, Узбекистон, Озарбойҷон, Русия ва Фаронса сухан намуданд. Дар ин хусус АМИТ «Ховар» бо истинод ба Донишгоҳи байналмилалии сайёҳӣ ва соҳибкории Тоҷикистон иттилоъ медиҳад.

Зимни ифтитоҳи конфронси илмию амалии байналмилалии «Тибби сайёҳӣ ва нақши он дар рушди илмҳои табиатшиносӣ ва дақиқ» гуфа шуд, ки тибби сайёҳӣ дар замони муосир ба бахши муҳими иқтисоди ҷаҳонӣ табдил ёфтааст, ки дар он тиб ва сайёҳӣ бо ҳам иртиботи зич доранд. Нақши чунин конфронсҳои байналмилалӣ дар таҳкими робитаҳои илмӣ ва омӯзишии байналмилалӣ муҳим мебошад.

Дар конфронси байналмилалӣ олимону коршиносони соҳа аз  Тоҷикистон, Озарбойҷон, Русия, Қазоқистон, Узбекистон ва Фаронса маърузаҳои пурмуҳтаво намуда, мавқеъ ва дурнамои рушди тибби сайёҳиро аз дидгоҳи илмӣ баррасӣ карданд.

 АКС: Донишгоҳи байналмилалии сайёҳӣ ва соҳибкории Тоҷикистон