Дар ноҳияи Сино ғолибони даври ноҳиявии озмуни «Оилаи беҳтарин» муайян карда шуданд

ДУШАНБЕ, 03.05.2025. /АМИТ «Ховар»/. Дар ноҳияи Синои шаҳри Душанбе даври ноҳиявии Озмуни ҷумҳуриявии «Оилаи беҳтарин» баргузор гардид.

Тавре ба АМИТ «Ховар» аз Мақомоти иҷроияи ҳокимияти давлатии ноҳияи Сино хабар доданд, дар озмун оилаи Иззатулло Халифаев аз маҳаллаи Испечак сазовори ҷойи якум, оилаи Бекмурод Пиров ва Мамлакат Мирзоева аз кӯчаи Спитамен соҳиби ҷойи дуюм, оилаи Идибек Шарифзода ва Фарзона Дамонова аз кӯчаи Ҳувайдуллоев ғолиби ҷойи сеюм дониста шуда, ба даври шаҳрии озмун роҳхат гирифтанд.

Озмун бо мақсади тақвият бахшидани мақом ва нақши оила дар ҷомеа, баланд бардоштани масъулияти оила дар таҳкими фарҳанги оиладорӣ, боло бурдани маърифати ҳуқуқии шаҳрвандон ва рӯзгордории оилаҳо, коҳиш додани шумораи бекоршавии ақди никоҳ, баланд бардоштани масъулияти падару модар дар таълиму тарбияи фарзанд ва омода намудани ҷавонон ба ҳаёти мустақилона баргузор гардид.

Президенти Ҷумҳурии Тоҷикистон муҳтарам Эмомалӣ Раҳмон дар яке аз суханрониҳо баён доштанд, ки «давлат дар доираи талаботи Конститутсия ҳифзи иҷтимоии аҳолӣ, аз ҷумла ҳимояи оила, ҳифзи кӯдакони ятиму маъюб ва таҳсилу табобати шаҳрвандонро кафолат дода, оиларо ҳамчун асоси ҷамъият ҳимоя менамояд».

Маҳз дар оила зиндагии инсон оғоз меёбаду муҳаббат, эҳтиром, хурсандӣ ва меҳрубониро меомӯзад. Дар оила ҳамчунин муошират кардан ва бо ҷаҳони берунӣ шинос шудан ба ҳамагон ёд дода мешаваду шинохти анъанаҳо ва аз насл ба насл мерос гузоштани онҳо низ аз оила маншаъ мегирад. Аз ин рӯ оила дар фарҳанги мардуми куҳанбунёди тоҷик ҳамчун ниҳоди муқаддас эътироф шудааст.

Ёдовар мешавем, ки даври ҷамъбастии Озмуни ҷумҳуриявии «Оилаи беҳтарин» дар Рӯзи байналмилалии оила- 15 май дар шаҳри Душанбе баргузор мегардад.

АКС: Мақомоти иҷроияи ҳокимияти давлатии ноҳияи Сино