Истгоҳи «Ваҳдат»-и Роҳи оҳани Тоҷикистон баъд аз навсозии пурра ба истифода дода шуд

ДУШАНБЕ, 29.05.2025. /АМИТ «Ховар»/. Истгоҳи «Ваҳдат»-и Корхонаи воҳиди давлатии “Роҳи оҳани Тоҷикистон” дар шаҳри Ваҳдат баъд аз навсозии пурра ва муҷаҳҳазгардонӣ ба истифода дода шуд. Дар ин хусус ба АМИТ «Ховар» аз Корхонаи воҳиди давлатии «Роҳи оҳани Тоҷикистон» иттилоъ доданд.

Истгоҳи «Ваҳдат»-и Роҳи оҳани Тоҷикистон, ки то имрӯз ба талаботи корӣ ҷавобгӯ набуд, бо талошу ташаббусҳои роҳбарияти Корхонаи воҳиди давлатии “Роҳи оҳани Тоҷикистон” дар доираи иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва вусъати тадбирҳои ободонию бунёдкорӣ ба истиқболи ҷашни 35-солагии Истиқлолияти давлатии Ҷумҳурии Тоҷикистон пурра навсозию муҷаҳҳаз гардонида шуда, бо тарҳу намои муосир ва шароити хуби корӣ мавриди истифода қарор дода шуд.

Тавре дар расми ифтитоҳи истгоҳи роҳи оҳан таъкид карда шуд, беҳтарсозии шароити корӣ дар тамоми раёсату муассисаҳои “Роҳи оҳани Тоҷикистон”, баланд бардоштани сатҳу сифати хизматрасонӣ ва боркашонию мусофиркашонӣ аз ҳадафҳои асосии роҳбарияти корхона ба ҳисоб меравад ва дар ин самт пайваста тадбирҳои зарурӣ андешида мешаванд. Иншооти истгоҳи “Ваҳдат” дар солҳои 20-уми асри гузашта бунёд гардида, ба талаботи имрӯзи хизматрасонӣ дар роҳи оҳан умуман ҷавобгӯ набуд ва шароити зарурии корӣ надошт. Маҳз дар даврони соҳибистиқлолӣ ва зери таваҷҷуҳу ғамхориҳои Пешвои муаззами миллат муҳтарам Эмомалӣ Раҳмон нисбат ба соҳаи роҳу нақлиёт инфрасохтори роҳи оҳани мамлакат бунёду навсозӣ ва таъмиру таҷдиди пурра карда шуда, ба талаботи муосир мутобиқ гардонда шуд.

Ёдовар мешавем, ки чанде пеш аз ҷониби Корхонаи воҳиди давлатии «Роҳи оҳани Тоҷикистон» бинои нави маъмурии Истгоҳи роҳи оҳани «Регар» баъд аз таъмир ба истифода дода шуд.

Бинои нави маъмурии Истгоҳи роҳи оҳани «Регар» дар муддати як сол бо ташаббуси роҳбарияти Корхонаи воҳиди давлатии «Роҳи оҳани Тоҷикистон» бунёд гардид. Дар он тамоми шароити мусоиди корӣ барои кормандони Истгоҳи роҳи оҳани «Регар» фароҳам оварда шудааст. Бино аз як ошёна иборат буда, дорои 1 маҷлисгоҳ, 11 утоқи корӣ ва дигар инфрасохтори зарурӣ мебошад.

Инчунин бинои нав бо шабакаи гармидиҳӣ пайваст гардидааст. Бинои қаблии Истгоҳи роҳи оҳани «Регар», ки ҳанӯз соли 1936 сохта шуда буд, хеле фарсуда гардида, ба талаботи рӯз мувофиқ набуд.

Ба истифода додани бинои нави маъмурии Истгоҳи роҳи оҳани «Регар» шароити мусоиди кориро барои кормандони ин истгоҳ, ки теъдодашон беш аз 65 нафар аст, фароҳам оварда, ба рушди соҳа муосидат менамояд.

АКС: Корхонаи воҳиди давлатии «Роҳи оҳани Тоҷикистон»