«ХАТЛОН-ҚАЛБИ ГАРМИ САЙЁҲӢ». Дар Кӯлоб форум ва намоишгоҳи байналмилалии сайёҳӣ доир мешавад

ДУШАНБЕ, 18.06.2025. /АМИТ «Ховар»/. 20 июн дар шаҳри Кӯлоб таҳти унвони «Хатлон – қалби гарми сайёҳӣ» форум ва намоишгоҳи байналмилалии сайёҳӣ баргузор мешавад. Ҳадафи он ҷалби сайёҳони хориҷию дохилӣ, муаррифии имконоти сайёҳии таърихию фарҳангӣ, табобатию экологӣ, кӯҳнавардӣ, шикор ва саёҳат дар вилояти Хатлон мебошад.

Тавре аз хадамоти матбуоти Раиси вилояти Хатлон ба АМИТ «Ховар» иттилоъ доданд, ин форум ба рушд додани ҳамкорӣ байни ширкатҳои ватанию хориҷӣ ва инфрасохтори сайёҳӣ мусоидат менамояд.

Рамзи форум ва намоишгоҳи байналмилалӣ тасдиқ гардид. Дар он тамоми имкониятҳои сайёҳӣ ва ёдгориҳои таърихӣ тасвир ёфтааст. Инчунин номи форум бо се забон инъикос гардидааст.

Ёдовар мешавем, ки шаҳри Кӯлоб бо таърихи куҳани худ таваҷҷуҳи олимону сайёҳони оламро ба худ ҷалб сохтааст.

Дар атрофи шаҳри қадимаи Кӯлоб шаҳрҳое амсоли Ҳулбук, Мунк, Бубакон, Тандичароғ, Искандара, Лангар, Маранда ва ғайра мавҷуд буданд, ки ҳанӯз дар асрҳои IX-VII — пеш аз мелод дар Осиёи Марказӣ маълум буданд.

Дар маркази шаҳри Кӯлоб оромгоҳи олим ва мутафаккири машриқзамин Мир Сайид Алии Ҳамадонӣ ҷойгир аст, ки ҳамасола теъдоди зиёди сайёҳони хориҷӣ ва дохилӣ ба зиёрати он меоянд.

АКС: Хадамоти матбуоти Раиси вилояти Хатлон