Бемориҳои музмини ғайрисироятӣ ҳамасола сабаби 1,8 миллион марги пешгиришаванда мегарданд

ДУШАНБЕ, 22.07.2025 /АМИТ «Ховар»/. Бемориҳои музмини ғайрисироятӣ чун сабаби асосии марг ва маъюбӣ дар ҷаҳон, аз ҷумла дар минтақаи аврупоии Созмони ҷаҳонии тандурустӣ боқӣ мондаанд. Дар ин ҷо ҳар панҷумин мард ва ҳар даҳумин зани то 70-сола бар асари бемориҳое, ба монанди бемориҳои дилу рагҳо, роҳҳои нафаси музмин, саратон ва диабети қанд мефавтанд. Дар ин хусус АМИТ «Ховар» бо истинод ба Созмони ҷаҳонии тандурустӣ хабармедиҳад.

Тибқи гузориши нави Дафтари аврупоии Созмони ҷаҳонии тандурустӣ, ҳамасола дар минтақа 1,8 миллион марги пешгиришаванда аз бемориҳои музмини ғайрисироятӣ ба қайд гирифта мешавад — фавтҳое, ки онҳоро метавон тавассути чораҳои муассири тандурустии ҷамъиятӣ пешгирӣ кард ё бо дастрасии саривақтӣ ба хизматрасонии босифат табобат намуд.

Зимнан аз шумораи умумии фавтҳои пешгиришаванда аз бемориҳои музмини ғайрисироятӣ 60 фоиз бо омилҳои хатаре алоқаманданд, ки онҳоро метавон пешгирӣ намуд, аз қабили истеъмоли тамоку ва машрубот, фишори баланди хун, ғизои носолим, фарбеҳӣ ва фаъолияти нокифояи ҷисмонӣ. 40 фоизи боқимонда ҳолатҳое мебошанд, ки бо ташхиси саривақтӣ ва дастрасӣ ба ёрии босифати тиббӣ метавонистанд маргро пешгирӣ кунанд ё ба таъхир андозанд.

Муборизаи муассир бо бемориҳои ғайрисироятӣ на танҳо барои саломатии ҷамъиятӣ муҳим аст, балки он дар маҷмуъ ба ҷомеа ва иқтисод манфиат меорад. Паст кардани сатҳи бемориҳо ва шумораи фавти пешгиришаванда метавонад рақобатпазирии кишварҳоро баланд намояд, ба дарозумрӣ ва солимии одамон мусоидат кунад ва ба онҳо имкон диҳад, ки дар ҷомеа саҳми арзанда гузошта, хароҷоти ҳифзи саломатиашонро коҳиш диҳанд.

Тавсияҳои калидии гузориш аз кам кардани таъсир ба омилҳои хатар ва таҳкими низомҳои тандурустӣ, аз ҷумла таъмини ташхиси барвақтӣ ва табобати босифат, бахусус барои гурӯҳҳои осебпазир иборат мебошанд. Ҳамчунин ҳамгироии пешгирӣ ва муолиҷаи бемориҳои музмини ғайрисироятӣ дар чаҳорчӯби миллии вокуниш ба ҳолатҳои фавқулода зарур аст.

АКС аз манбаъҳои боз