Дар шаҳри Толятии Федератсияи Русия ошхонаи миллии тоҷикӣ ифтитоҳ гардид

ДУШАНБЕ, 15.10.2025. /АМИТ «Ховар»/. Дар шаҳри Толятии Федератсияи Русия ошхонаи миллии тоҷикӣ ифтитоҳ гардид. Дар ин хусус мухбири махсуси АМИТ «Ховар» дар Федератсияи Русия хабар медиҳад.

Намои берунии иншоот бо шаклу услуби хоси меъмории миллӣ тарҳрезӣ гардида, дар тарғиби фарҳанги ғании миллии тоҷикон ва тақвияти муаррифии он дар арсаи байналмилалӣ мусоидат хоҳад намуд. Ин ошхона бо ташаббуси Ҷамъияти тоҷикони шаҳри Толятии Федератсияи Русия сохта, ба истифода дода шуд.

Дар ошхона навъҳои зиёди таомҳои миллии тоҷикӣ омода ва ба мизоҷон пешниҳод мегарданд. Маҳорати баланди омода намудани таъоми миллии тоҷикон ва фазои гарму меҳмондӯстонаи он аллакай таваҷҷуҳи на танҳо ҳамватанон, балки дигар сокинони маҳаллиро низ ба худ ҷалб намудааст.

Масъулини ошхона нақша доранд, ки дар ин макон барномаҳои гуногуни фарҳангӣ, аз ҷумла шоми шеъру суруд, намоишгоҳи ҳунарҳои мардумӣ ва рӯзҳои миллии таомҳо баргузор намоянд. Амалисозии чунин ташаббусҳо намунаи равшани худшиносӣ ва эҳтиром ба арзишҳои миллӣ аз ҷониби ҳамватанон дар хориҷи мамлакат мебошад.

Бунёди ошхонаи миллӣ дар шаҳри Толяти дар баробари таҳкими робитаҳои иҷтимоиву фарҳангӣ, инчунин барои шинос намудани дигар миллатҳо бо арзишҳои миллӣ ва дастовардҳои фарҳанги тоҷикон заминаи мусоид фароҳам меорад. Ин иқдом дар пайравӣ аз сиёсати фарҳангпарваронаи Ҳукумати Ҷумҳурии Тоҷикистон оид ба ҳифз ва тақвияти мероси миллӣ дар хориҷи мамлакат амалӣ гардида, барои муаррифии Тоҷикистон дар арсаи байналмилалӣ қадами муҳим маҳсуб мешавад.

АКС: АМИТ «Ховар»