Лоиҳаи устоди Донишгоҳи техникии Тоҷикистон дар озмуни байналмилалӣ дар Чин соҳиби Ҷоизаи аъло гардид

ДУШАНБЕ, 29.10.2025 /АМИТ «Ховар»/. Лоиҳаи устоди Донишгоҳи техникии Тоҷикистон ба номи академик Муҳаммад Осимӣ  Абдулло Мамадамон таҳти унвони «Баланд бардоштани самаранокии системаҳои нақлиётӣ ва кам кардани таъсир ба муҳити зист: Таҳқиқот оид ба таҷҳизоти гидравликӣ ва ҷузъҳои автомобилӣ» дар Озмуни байналмилалии инноватсия ва соҳибкории «Хайҷзи» дар Осиёи Шимолу Шарқӣ бо Ҷоизаи аъло (Excellence Award) сарфароз шуда, соҳиби сертификати озмун гардид.

Тавре АМИТ «Ховар» бо истинод ба Донишгоҳи техникӣ хабар медиҳад, озмун аз 23 то 26 октябр дар Парки саноатии иқтисоди рақамии шаҳри Шеняни Чин таҳти унвони «Ҷамъомади зеҳнӣ дар Ляонин ва Шенян — бунёди орзуҳо барои оянда» баргузор шуд.

Беш аз 320 лоиҳа аз 29 давлат дар нуҳ самти муҳими саноатӣ, аз ҷумла биотиб, робототехника, технологияҳои иттилоотии нав, маводҳои нав, сарфаи энергия ва ҳифзи муҳити зист, энергияи нав ва қисмҳои автомобилӣ пешниҳод гардид.

Дар даври ниҳоӣ, ки бо ҳузури 22 даста аз 15 мамлакат тариқи ҳузурӣ ва 28 даста ба таври маҷозӣ доир гардид, намояндагон лоиҳаҳои худро оид ба навовариҳои техникӣ, аҳамияти саноатӣ ва имконияти татбиқи амалии онҳо муаррифӣ намуданд.

АКС: Донишгоҳи техникии Тоҷикистон ба номи академик Муҳаммад Осимӣ