Ҷаласаи 16-уми пленарии Ассамблеяи парламентии Осиё дар шаҳри Манамаи Шоҳигарии Баҳрайн баргузор гардид

ДУШАНБЕ, 28.01.2026 /АМИТ «Ховар»/. Муовини якуми Раиси Маҷлиси намояндагони Маҷлиси Олии Ҷумҳурии Тоҷикистон Шермуҳаммад Шоҳиён дар ҷаласаи 16-уми пленарии Ассамблеяи парламентии Осиё дар шаҳри Манамаи Шоҳигарии Баҳрайн иштирок намуд. Дар ин хусус АМИТ «Ховар» бо истинод ба Маҷлиси намояндагон хабар медиҳад.

Таъкид шуд, ки Парламенти Ҷумҳурии Тоҷикистон тақвият ва рушди ҳамкориро дар доираи Ассамблеяи парламентии Осиё муҳим мешуморад.

«Имрӯз, дар шароите, ки ҷомеаи ҷаҳонӣ бо таҳдидҳои гуногун ба арзишҳои умумибашарӣ рӯ ба рӯ мебошад, гуфтугӯи созанда байни фарҳангҳо ва тамаддунҳо беш аз ҳар вақти дигар мубрам аст. Таҷрибаи таърихӣ нишон медиҳад, ки маҳз тавассути муколама ва ҳамдигарфаҳмӣ халқҳои Осиё тавонистаанд сулҳ, ҳамкорӣ ва пешрафтро таъмин намоянд. Парламентҳои кишварҳои Осиё метавонанд заминаҳои устувори таҳаммулпазирӣ, эҳтироми гуногунандешӣ ва ҳамзистии осоиштаро фароҳам оваранд», — гуфт муовини якуми Раиси Маҷлиси намояндагони Маҷлиси Олӣ.

Иброз гардид, ки паҳншавии идеяҳои ифротгароёна, суиистифода аз эътиқоди динӣ барои ҳадафҳои сиёсӣ, кофӣ набудани сатҳи маърифати ҳуқуқӣ ва фарҳангӣ ва таъсири манфии баъзе равандҳои иттилоотӣ метавонанд монеаи рушди муколамаи созанда гарданд. Бинобар ин, Шермуҳаммад Шоҳиён афзуд, ки барои бартарафсозии онҳо бояд самтҳои зеринро амалӣ намуд:

Нахуст, тақвияти нақши қонунгузорӣ дар пешгирии ифротгароӣ, таблиғи фарҳанги сулҳ ва эҳтироми гуногунандешӣ. Қонунҳо бояд на танҳо барои муҷозот истифода шаванд, балки хусусияти тарбиявӣ ва пешгирикунанда дошта бошанд.

Дуюм, бо густариши ҳамкории байнипарламентӣ дар доираи платформаҳои минтақавӣ ва байналмилалӣ Ассамблеяи парламентии Осиё метавонад ба минбари доимии табодули афкор ва ташаббусҳо дар соҳаи гуфтугӯи тамаддунҳо табдил ёбад.

Сеюм, ҷалби ҷавонон, ҷомеаи шаҳрвандӣ ва доираҳои илмӣ ба ин раванд. Бе иштироки фаъоли насли ҷавон гуфтугӯи байнифарҳангӣ наметавонад устувор ва дарозмуддат бошад.

Чорум, истифодаи технологияҳои рақамӣ барои густариши муколамаи фарҳангӣ. Технологияи рақамӣ метавонад ба василаи муассири наздиксозии мардум, хусусан ҷавонон табдил ёбад.

Гуфта шуд, ки Тоҷикистон пайваста масъалаҳои марбут ба сулҳ, амният ва рушди устуворро дар сатҳи Созмони Милали Муттаҳид ва дигар минбарҳои байналмилалӣ матраҳ менамояд ва омода аст ҳамкориро бо Ассамблеяи парламентии Осиё ва парламентҳои кишварҳои аъзо дар ҳама самтҳои мавриди таваҷҷуҳи тарафайн густариши бештар диҳад.

Изҳори итминон карда шуд, ки натиҷаҳои иҷлосияи 16‑уми умумии Ассамблеяи парламентии Осиё ба таҳкими ҳамкории байнипарламентӣ, пешбурди сулҳу субот, ҳамдигарфаҳмӣ ва рушди устувор дар қитъаи Осиё ва ҷаҳон мусоидат мекунанд.

АКС: Маҷлиси намояндагони Маҷлиси Олии Ҷумҳурии Тоҷикистон